Ha iew Mawiong, shongdor u phan tang T.6 haduh T.10 shi kilo

Shillong, 9 Nailar:
Napdeng ki mar rep kiba wan die ha katei ka iew u phan u kham tad dor ban ia kiwei ki mar rep kumba long mynta. Ha kane ka iew Dielang (regulated market) ba la buh ka sorkar dei tang lai tylli ki mar rep kiba kongsan kiba la wan die ha katei ka iew kita ki long tang u Phan, Synsar bad u Sla Tyrpad. Ki don ruh kiwei kiwei ki mar rep, hynrei la wan die tang ha ki por ki por aiom bad kim long baroh shi snem lynter.
Mynta ka sngi, u Rupang u la ioh ban twad jingtip ia ka jinglong jingman jong ka Iew Dielang, la shem ba u Phan ba kumba 15 tyngka shi kilo u la hiar sha ka 10 tyngka shi kilo u ba shi nombor. Katba kiwei ki mar rep u Synsar bad Sla Tyrpad kila kiew dor ha kane ka iew.
Ha ka jingiakren bad uwei kharkaia ba ju thied phan u la iathuh ba don bun jait ki phan bad ki phan ki baheh babha lane uba shi nombor la thied ha ka dor 10 tyngka, uba ar nombor la thied 8 tyngka bad u ba lai nombor pat la thied ha ka dor 6 tyngka shi kilo.
Ia kine ki phan la wanrah na kylleng ki thain ka Ri Khasi kum na Lyngiong, Sohiong, Mylliem, Smit, Laitlyngkot bad kiwei kiwei de ki jaka. Ia kine ki phan la ju shalan sha kylleng ki jaka wat sha shabar jylla ruh kum sha Assam.
Haba iakren pat bad uwei u Marwari uba thied Synsar u la ong ba u synsar u la kiew dor namar ba ki briew ki ba wan die kidei tang kito ki ba la buh thup (stock) lypa.
Une u Marwari u la iathuh ruh ba ia u synsar la thied la ki jong ki jong ki dor. U Synsar u ba shi nombor u shongdor haduh 67 tyngka shi kilo bad u ba ar nombor u shongdor haduh 57 tyngka shi kilo. Katkum ka jingiathuh jong une u Marwari la ong ba ki synsar ki ba kham bha la ju kham pynmih na kum ki thain Jirang na ri Ri Bhoi District,Mawsynram, Balat, Synteng, Lawbah na East Khasi Hills bad na Jaintia Hills.
La iathuh ruh ba ha hangne ha Ri India ki don tang lai tylli ki jylla kiba ju pynmih ia u synsar bad kita ki dei tang na Assam, Meghalaya bad na Sikkim. Ia u synsar la shalan sha kylleng ki jylla ka Ri India bad la ju pyndonkam ban sar iing.
Katba ia ka dor u sla Tyrpad pat la thied ha ka dor 35 tyngka ba shi nombor bad 25 tyngka ba ar nombor. Ia ki sla tyrpad ki kham bha la kham shem na ki thain Mawsynram bad Phlangwanbroi. Ia ki sla tyrpad la wan die na ki thain Shella, Dawki bad kiwei kiwei de ki thain.