Ha Germany uwei u briew u ioh 2 vote, ong ka Mem

Shillong,6 Jymmang:
Ka Ms C Guenauer, ka mem na Germany kaba dei ruh ka Lecturer , bad ka Research Scholar na Germany ka la ong ha Germanay uwei u briew u don ar tylli ki Vote, kawei ba un vote ia u kyrtong ba u mon bad kawei pat ka vote ba un vote ia ka seng ba u mon. Katei ka mem ka la ong ruh ba ha Germany, ka ri ba bun ki Kristan ia ka sngi thep vote la ju pynlong ha ka sngi u blei ha kaba ki paidbah ki jlah ban thep vote hadien ba la wai jingiaseng.
Katei ka mem na ri Sepngi ka la sah la katto katne por ha India ban peit ia ka rukom long jong ki paidbah ha ka por elekshon, ha ka jingiohi jong ka ka la ong ba ka don bunbah ki jingiapher ha Meghalaya bad ha Germany ha kaba ha kane ka jylla ki paidbah ki peit ia u briew ne u kyrtong ba ia khun elekshon katba ha Germany pat ki peit ia ka party. Ka la ong ba ha Germany ki mat elekshon ba ki party bad ki kyrtong ki buh hakhmat eh ka dei ka koit ka khiah ( Health Insurance,), ka khajna ( Taxes) bad nangta bud sa kiwei pat ki mat.
Ha ka jingsah jong ka ha kane ka jylla h aka por elekshon ka mem Guenauer, ka la ong ba ka la leit ban shong ha ki jingialang ialap elekshon jong ki seng sain pyrthei bapher bapher ki seng riewlum bad ki National Party bad kaba la pynlyngngoh eh ia ka ka long ba la ju pynlong ia ki jingialap elekshon ha ki jaka iew ba long

paidbah bad ki paidbah ruh ki ieng da ki bun bun kynta ban sngap ia ki nongkren ialap elekshon.
Ka Ms Guenauer ka la pynpaw ia kitei ki jingshem jong ka ha ka jingiakynduh jong ka mynta ka sngi bad ki Khlieh Nongsynshar shnong ba kynthup naduh ki Syiem, ki Sordar, ki Doloi bad ki Rangbah shnong. Ha katei ka jingiakynduh ka mem ka la kylli jingkylli ruh na ki Khlieh nongsynshar shaphang ka synshar khadar ha kane ka ri.