Nongpoh:Na kaba la lap hynnin ka sngi, la iohi ba ka jaka ai Tika iada COVID-19 ha Byrnihat PHC, ka la khapngiah eh, namar ka jingbun palat ki briew kiba kwah ia katei ka Tika, ha kaba la iohi ba ki bynta shwa ban rung sha jaka ai Tika, ki briew ki la shu ia ieng khapngiah iwei ia iwei bad nalorkata, la iohi ba ki jaka shong ruh ki khapngiah.
Ym lah ban tip la kitei ki briew ki dei na ka jylla Meghalaya ne Assam, namar katei ka thain ka la iajan eh bad ka Assam, pynban katkum ka jingiathuh ki briew kiba don ha katei ka jaka, ki ong ba kitei ki briew kiba bun hi ki dei na Meghalaya.
Lada ka jingdon ki briew kiba leit ban shim ia ka Tika iada COVID-19, ka long kumba long hynnin ka sngi, kaba mut ba ki paidbah kiba hap ha Byrnihat PHC, ki long kiba kloi ha ka ban leit shim bynta ia ka Tika iada COVID-19 bad kaba lah ruh ban ong ba kan long kum kawei na ki nuksa sha ki paidbah, kiba hap ha ki PHC bapher bapher.
Haba iadei bad katei ka jinglong kloi ki paidbah ban mih shakhmat, na ka bynta ban leit shim ia ka Tika iada COVID-19, u la pynpaw ia ka mynsiem ba u kmen eh ba ki paidbah, ki la shimkhia ban mih shakhmat bad kiba la sngewthuh ia ka jingdonkam ka Tika iada COVID-19.
Halor katei ka bynta ka jingmih ki paidbah ban shim ia ka Tika, u MLA Jirang, u la ai ka jingiaroh ia ki briew ka koit ka khiah bad kumjuh ruh ia ki nongialam shnong, kiba la shimkhia ban pynshai sha ki paidbah, halor ka jingdonkam ban shim ia ka Tika iada COVID-19.
Phi don ban ong eiei?