Ha Bhoirymbong, kut noh ka ‘Signature Campaign’ ka JAC pyrshah ktem ‘Khalai’ ha Ri Bhoi

Nongpoh: Ka ‘Signature Campaign’ jong ka Joint Action Committee Against Casino (JACAC), ne ka kynhun kaba la thaw kyrpang hapdeng ki nongialam seng bad ki kynhun seng, na ka bynta ban pyrshah ia ka jingthmu wanrah ktem ‘Khalai’ ka sorkar ha Ri Bhoi bad ruh ban dawa na ka sorkar jylla bad ka dei ban pynduh pyndam noh ia ka ain Khalai ha ka jylla bad kaba tip kum ka Meghalaya Regulation of Gaming Act 2021, ka la kut noh mynhynnin ka sngi ha Bhoirymbong, kata hadien ba la pyndep ha ki 10 tylli jaka ba bun paid ha Ri Bhoi.

Haba pynkut ia katei ka ‘Signature Campaign’ jong ka JACAC ha Bhoirymbong, la iohi ba u Bah George B. Lyngdoh, MLA Umroi, u la wan ban iashimbynta da kaba soi ha katei ka jaka kaba la buh da ki nongialam shnong lem bad ki kynhun seng ha Ri Bhoi. Kum ban shu kdew hangne, ba ia ka JACAC la thaw ha ka jingiatrei lang hapdeng ki nongialam shnong lem bad ki nongialam jong ki kynhun seng, kiba kynthup ia ka KSU, FKJGP, HNYF, ha kaba ka jingthmu jong katei ka JACAC, ka long ban ym ailad ia ka Ktem ‘Khalai’ ba kan urlong ha Ri Bhoi bad ha kajuh ruh ka por ka long ban dawa na ka sorkar, ba ka dei ban pynduh pyndam noh ia katei ka ain ‘Khalai’ ha ka jylla.

Ki 10 tylli ki jaka ba kham lum paidbah ha Ri Bhoi, kata ha Nongpoh, Umsning Byrnihat, Bhoirymbong, Umiam, Umsning, 20Mer, Khanapara, Patharkhmah bad Mawhati, ha kaba ka jingthmu jong katei ka ‘Signature Campaign’, ka long ban dawa na ka sorkar ba ka dei ban pynduh pyndam noh ïa ka Aiñ ‘Khalai’ bad kaba la tip kum ka Meghalaya Regulation Gaming Act (MRGA) 2021.

Ha ka jingkren da ki nongialam jong ka JACAC, ka long ba ki la pynlong khnang ia katei ka jingiasoi paidbah, ka long ban ioh ia ka jingkyrshan na ki paidbah ban pynpaw ia ka jingpyrshah ia ka ktem ‘Khalai’ ha Bhoi bad ruh ban pynduh pyndam noh ia ka Ain ‘Khalai’ ha ka jylla. Ka long ruh ka jingshisha ba ha ka jingkren jong ki, ka long ba hadien ba la kut katei ka ‘Signature Campaign, kin sa lum paidbah ban tur sha Secretariat bad ban kynduh ïa u Myntri Rangbah ka sorkar jylla, na ka bynta ban pynpaw ia ka jingpyrshah ia ka ktem ‘Khalai’ ha Ri Bhoi bad ruh ban weng noh ia katei ka ain ‘Khalai’ hapoh ka jylla.