Nongpoh: Ha ka sngi kaba bud ba u Bah Michael Warjri, u Secretary ka Hima Nongspung, u la shah hiar thma ha ki paidbah jong katei ka thain, hynnin ka sngi ki nongialam jong ki kynhun sengbhalang ha Ri Bhoi kiba kynthup ia ka HNYF, FKJGP, HYC lem bad kiwei ki la hiar ban jurip ia ka iing jong utei u Secretary, kaba la shah pynjulor ha ki briew kiba sah ha katei ka thain.
Ka Ambulance, kaba la shah pynpait ha ki runar ha phyllaw iing U Bah Michael Warjri.
Haba hiar jurip ia katei katei ka iing kaba la shah pynjulor, la iohi ba katei ka iing jong utei u Secretary ka Hima Nongspung, ka la shah pynjulor shaba palat pud, ha kaba la iohi ba kitei ki paidbah ym tang ba ki pynjulor ia ka iing, hynrei ki da pynjulor ruh ia ki jingthung jingtep bad thang ruh ia ki kot ki sla ba donkam, pynjulor ia ka Ambulance haba don ha katei ka iing bad thang ia kawei ka Komputor.
La lap ruh ba ha katei ka shnong New Balakhwa, kaba u Bah Micheal Warjri u sah, ka dei tang katei hi ka iing Khasi kaba don ha katei ka thain, hynrei lait nangta bun hi kiba sah ki dei na kiwei pat ki jaid bynriew.
Ka long ruh kaei kaei kaba sngewlyngoh, ba ha katei ka jingleit jurip da kitei ki nongialam sengbhalang, ym shem la don wat tang uwei na ki paidbah jong katei ka shnong ki ban mih ha katei ka iing kaba la shah pynjulor, hynrei kaba kham pynlyngoh eh ka long ba wat ki nongkitkam ka Hima Nongspung, ym shem la wan mih.
Haba kren sha ki lad pathai khubor, u Samla Kitboklang Nongphlang, Chief Organizer ka FKJGP bad u Bah Marcus Marten, ki la pynrem jur halor katei ka jingjia bad khamtam eh ia kito kiba la donkti ban leh ia katei ka kam bymman, ha kajuh ruh ka por ki la kynnoh ba baroh katei ka jingjia ka la mih tang na ka daw ka jingbym shimkhia da ka sorkar jylla ban pynbeit noh ia u pud u sam.
Phi don ban ong eiei?