Ha Amlarem kolej, pule da ka syllabus barim, ioh jingkylli da ka syllabus thymmai ha ka Economics

Shillong: Ka Hynniewtrep Youths’ Council (HYC) War Jaintia Cicle, ka la ujor pyrshah ia ka Riwar Jaintia College kaba don ha Amlarem West Jaintia, hadien ba la ioh jingujor na ki khynnah class 12 jong katei ka college, na ka jingleh thurmur jongka ia ka lawei kitei ki khynnah pule.

Katkum ka jingiathuh kitei ki khynnah pule, u nonghikai economics jong katei ka college, u ai jinghikai hapoh class ia kitei ki khynnah kiba shim ia ka subject economic da ka old syllabus, hynrei katba ha ka final (HSSLC) examination pat ki wan da ki jingkylli jong ka new syllabus, katkum ba la set daka MBOSE.

Kitei ki khynnah ki dap da ka jingsngewkyndit hapoh hall examination, tang mar ia peit ia ki jingkylli namar ki jinghikai hapoh class bad ki jingkylli ka MBOSE kim iahap satia. Kumta tang mar iamih napoh hall Examination kitei ki khynnah ki la leit iakynduh ia ki nongpyniaid ka Riwar Jaintia College ban ia thir sani bha halor katei ka bynta. Halor katei ka phang ka college ruh ka la kubur ba ka dei ka jingbakla jongka, kumta ka la kular ban iarap iaki khynnah da kaba kan phah jingthoh sha ka MBOSE bad kumjuh ruh sha ka Sub-Divisional officer Civil Amlarem; hynrei katei ka jingkular jong katei ka college kam poi shaei shaei ruh namar hapoh office ka Sub-Divisional officer Civil Amlarem kitei ki nongpyniaid jong katei ka college, ki la phah soi pynban iaki khynnah da kaba ki kynnoh ba kam dei ka jingbakla ka college, hynrei dei ka jingjaituh ki khynnah ban pule kot, la kynnoh ka Riwar Jaintia College.

Halor katei ka jingkynnoh khlem nongrim jong katei ka college, kitei ki khynnah pule ki dap da ka jingsngewsih kthang bad duh jingkyrmen namar ba kim poi pyrkhat ba ka tei ka college kan long maw jynthut ia ka lawei ba phyrnai jongki. Kumta ha ka kutlad kitei ki khynnah ki la leit ujor sha ka seng Hynniewtrep Youths’ Council (HYC) War Jaintia circle.

Ka seng mar syn ioh ia katei ka jingujor jong kitei ki khynnah, khlem da pynslem ka seng ka la wad bniah iaki sakhi ki sabut katkum ka jingkynnoh kitei ki khynah ia katei ka college. Hadien ba ka seng ka la ialeh shitom ban wad bniah ia ki sakhi kiba biang, kumta khlem da pynslem ha ka 19 tarik Jymmang, 2020, ka la ujor sha ka MBOSE halor ka jingleh thurmur ka Riwar Jaintia College.

Ha ka 15tarik Jylliew, 2020 pat, hapoh ka jingialam u Asst.sec u samla Ededisuk Shylla bad u Publicity secretary, u samla Riki Mukhim ka seng ryngkat bad kitei ki khynnah ki la leit sha ka Sub-Divisional officer Civil Amlarem ban pan jingpynshai halor ka jingphah soi ka College ia kitei ki khynnah.

Hadien nangta kitei ki khynnah ruh ki la weng syndon ia katei jingphah soi katei ka College bad ki kyntu ruh ia ka SDO ba lada long kumno kumno ruh kane ka case hap ban iaid beit shakhmat khnang ban ioh iaka jingbishar kaba hok. Kumta ha ka 19tarik Jylliew,2020 ka seng ka la phah jingthoh biang shaka MBOSE ba kan shim khia kyrkieh ia katei ka kam ha shwa ban mih ka result kitei ki khynnah.