Great Wall of China ha Lummawbah

Shillong, 27 Naitung:
U Bah Pynshai M Syiem MLA ba rim ka Mylliem, ula phah ka jing ujor, sha u myntri ka Sor kar India, Arun Jaitley halor ka jingker kynroh u shipai ha ki thain Lum mawbah Upper Shillong. Ula ong ba kane ka jingleh ki shipai ka la pynjngai ia ka jingiadei hapdeng u paidbah. Ula ong ba la ker kynroh kum ka “Great Wall of China”. Balei yn ker tang ki thain Lummawbah kat haduh ki jaka ialehkai ki khynnah ki jaka tong um la skut lut, balei ka District Administration lane ki nongmihkhmat ba don bor kim tuklar ia kane, kren bynniaw u Bah Pynshai. U lyngngoh haba ia kiwei ki jaka kum ha Luckier Road, la ai ban shna dukan ia ki heh spah, katba ha Lummawbah pan tang ia ka jaka ba ju leit tong um ki paidbah jong ka Lummawbah, ym ai. Ula ong ba dei ban jurip bniah ia kane ka jingleh ki shipai balei shawei shah ban shna ing ym ju ker, katba ha ki thain Upper Shillong la ker lut. Ula pynkynmaw ba ula ioh bun ki shithi na ki Defence Minister barim halor kane ka kam katba mynta pat wut wut la shu ker lut. Ula kyntu ha ka shithi ia ka District Administration bad ia ki bor shipai lyngba u Defence Minister ban pyn sangeh noh shuwa lane ban pyllait ia ka jingker ia ka tyllong um jaka sait jain ha Dong nan bad ka jaka ba ju ialehkai ki khynnah hajan surok bah.