Elekshon MDC ha GHADC ha u Rymphang

Shillong, 3 Nohprah:
Ka sorkar jylla ka lah ban pynlong ia ka elekshon MDC sha ka Garo Hills Autonomous District Council (GHADC) ha ka taiew ba ar jong u Rymphang la shem snem.
U Myntri ba peit ia ka district council u Bah HDR Lyngdoh u la ong mynta ka sngi, ba ka sorkar jylla ka la thmu ban pynlong ia ka elekshon MDC ha GHADC ha ka taiew ba ar jong u Rym phang. “Ngin pyndep ia ki jingdonkam baroh shwa ka 17 tarik Rymphang namar ba ka por pynjlan ia ka GHADC kan kut ha kane ka sngi”, la ong u Bah Lyngdoh.
Katkum ka jingong u Bah Lyngdoh, ka sorkar jylla ka hap ban pynslem ban pynlong ia ka elek shon sha ka GHADC ka dei namar ba ka khmih lynti ba kan treikam ka jingiasoi kular bad ka ANVC bad ANVC-B ban pynbun ia ka jingdon jong ki MDC.
U Myntri u la ong ba ki la pynslem ka dei ruh namar ba la phiah thym mai ia ki konstitwensi ki MDC.
“Mynta, ngin iaid shakhmat ban pynlong ia ka elekshon kumba long kaba rim kata na ka bynta 29 ngut ki MDC”, la ong u Bah Lyngdoh.
U la ong ba baroh ki jingdonkam la shim ka sorkar na ka bynta ban pynthikna ba ka elekshon kan long kaba khuid kaba iaid beit iaid ryntih khlem ka jingthut watla ka don ka jingjur ki kam pyntriem kum ka GNLA.
Shwa ia kane,u myntri rangbah ka jylla u Dr Mukul Sangma u la ong ba ka sorkar kan hap ban pynlong ia ka elekshon MDC sha ka GHADC namar ba ka jingthmu ban pnykylla ia ka Sixth Scheduled ka riti synshar ka ri ka dang sahteng na ka bynta ban pynbun ia ki MDC kumba la iasoi ia ka soskular bad ka ANVC bad ka ANVC-B.
“Ka elekshon MDC sha ka GHADC kan iaid kumba ju long kaba rim na ka bynta 29 ngut ki MDC”, la ong u Dr Sangma.
U la ong ba ka jingthmu ban pynkylla ia ka riti synshar ka ri ka dang shim por shwa bad namar kane, ka sorkar ka la hap ban pynlong ia ka elekshon kumba long kaba rim.
U la ong ba shisien ba la pynkylla ia ka 6th scheduled, ka jingpynbun ia ki MDC kan treikam lang ha KHADC bad ha JHADC.