Elekshon 2014 bad ka RSS:Ramesh

NewDelhi,24 Risaw:
Ka elekshon MP Lok Sabha 2014 ka ban sa long shen ka dei ka jing iakhun hapdeng ka seng Congress bad ka RSS , ym bad ka BJP ong u Myntri ka sorkar pdeng u Jairam Ramesh uba la ong ba ka BJP ka dei ka seng kaba la mih tynrai na ka RSS.
U Ramesh u la ther tyngeh ruh ia ka BJP bad u kyrtong Myntri Rangbah Duh jong ka u Narendra Modi, da kaba ong ba katei ka liang pyrshah ka la buh thong beit tang ia u Modi katba ka seng Congress pat ka la pan jingkyrshan na ki paidbah ba kin kyrshan ia ka seng bad ka rukom treikam jong ka.
“Kaei kaba la jia ha ki khyndiat bnai ba la dep ka dei ka jingpynshisha halor ka elekshon MP Lok Sabha 2014 ba kam dei ka jingiakhun hapdeng ka Congress bad ka BJP hynrei ka jingiakhun ka dei hapdeng ka Congress bad ka RSS, namar kaei kaba ka RSS ka hukum ka BJP ka leh ia kata” ong u Ramesh haba ia kren sha ki nongthohkhubor.