EKSAMIN BHA IALADE

DR. B.R. MARPNA

Kane ka kyntien ka kit jingmut shibun ia ngi ki briew. Ka jingpeit bniah bha ialade ka long kaba donkam haduh katta katta. U Doktor uba sumar ia ki briew haba ki briew ki wan shim dawai, u ju thew ka BP bad bad ka jingtlot jong u briew la ka long ba u ne ka briew ki don ki jingshitom kiba kham jur, u ju phah ban leh ki test kiba pher bapher la ka long ka Diabetes, Ultrasound, Endoscopy, Xray, MRI ne kiwei kiwei pat ki test kiba ngim lah ban jer kyrteng. Ka jingtest ka long la ha ka jingpang jingpang. Haba phah ban test kumne kim dei ban leh sting ne bym suidniew namar ka lah ban nang kham jur ka jingpang. Haba ngi phai sha ki Saiastis ruh ki ju leh bniah bha ki research haba ki thmu ban leh ia kano kano ka kam. Ka lah ban shim por da ki snem ne wat da ki phew snem ruh ban pyntreikam ia ki research jong ki namar lada ym leh kumta, ka lah ban wanrah ka jingma.

Haba leh ia ki test ne research kumba la batai haneng, la ka long ki Doctor ne ki Saiantis bad lada kim iohi ia kaba bha bad ki hap ban phai pat sha kaba kham bha shuh shuh khnang ba kita ki jingsumar ne ki research jong ki kin long kiba jop. Ki donkam ban peit bniah man la ka por hato ka jingleh jong ki ka long kaba biang?

Ha ka jingim ba kynja mynsiem jong ngi ruh, ngi donkam haduh katta katta ban peit ne tynjuh kumno ka jingiadei jong ngi bad U Blei. Hato ka lynti jong ngi ka long kaba pynsngewbha ia U? Hato ka dohnud jong ngi ka beit bad U Trai? Ka long kaba donkam bha ban eksamin ia ka jingiadei ne ia ka jonglong mynsiem jong ngi man la ka por khnang ba ki jingpang ba kynja mynsiem kin nym lah ban pyntlot ia ngi ne kjap ia ngi. To ngin iit bha ialade nyngkong haei ngi duna bad haei ngi tlot khnang ban ngin lah ban pynbeit bha ia ka jinglong mynsiem namar teng teng ngi sngew kumba biang lut nadong shadong. Ka don ka tarajur jong U Blei ban thew ia ngi. Ka Ktien jong U Blei ka don ban kren sha ngi lyngba ki kyntien harum:

“To ngin iit ngin tynjuh ia la ki lynti bad ngin phai pat sha U Trai” (Jingrwai Sngewsynei 3:40)

“To iit ia nga, A U Blei, bad to tip ia ka dohnud jong nga: to tynjuh ia nga, bad to tip ia ki jingmut jong nga: bad to khmih la ka don ha nga ka lynti bymman, bad to ialam ia nga ha ka lynti bymjukut” (Ki Salm 139:23,24)

U BLEI UN KYRKHU, AMEN