Shillong: Ka Dorbar Shnong Lawsohtun, ka la phah da ka ejahar mynta ka sngi, pyrshah ia ka Kong Patricia Mukhim, halor ka jingthoh jong ka ha facebook, ha kaba ka la kynnoh ba kiba shoh ia ki samla bar Jylla, ki dei ki khynnah trai shnong (tribal) bad ka dawa, ba dei ban kem ia ki mardor.
Ka kong Patricia, ha katei ka jingthoh jongka, ka kynnoh shuh shuh ba kitei ki nongthaw kulmar shnong, kiba la ju mlien ban leh ia kane ka kam, naduh u snem 1979, hynrei kim pat ju shah kem satia haduh ha kine ki sngi ruh bad katei ka pyni shai, ba ka ain ha Meghalaya kam trei kam shuh satia, ka la ong.
Ka jingthoh jong ka kong Patricia, kaba leit kdew ia u snem 1979, ka la pynlong ia ki kotkhubor kiba na West Bengal, ba kin thoh ia ki khubor pyn iapher jaitbynriew bad kaba buh jingma kaba khraw ia ki Khasi kiba don shabar jylla, ong shuh ka Dorbar Shnong, ha ka ejahar sha U Superintendent of Police, East Khasi hills, Shillong.
La ong shuh shuh ba ka la kynnoh, ia kaei kaba ka dorbar shnong, ha katei ka jaka ba ka la leh “Hato ki don khmat bad ki donshkor ban peit ha madan? Kim tip, ba ki don ki riew pyn kulmar ha ka shnong jongki?” Halor katei ka mat, ka dorbar shnong, ka shim ba ka kong Mukhim, kam shym la pyn jah burom tang ia ka dorbar Shnong, hynrei ia u paidlang jong ka shnong hi baroh kawei, khlem da tip eiei ia ka jing shisha bad kaba la pyn jah burom ha khmat ka pyrthei hi baroh kawei.
Ka ejahar sha ki pulit, ka dawa namarkata, ba dei ban pyn saja ia ka kong Patricia Mukhim, ha ki kyndon 153 A, 505 bad 499 jong ka Indian Penal Code, ong ka ejahar na U bah Lurshai Shylla, Rangbah Shnong bad U bah Bankhrawkupar Sohtun, General Secretary ka dorbar Shnong Lawsohtun.
Phi don ban ong eiei?