Shillong: Ka sorkar jylla, ka la ujor pyrshah ia shibun ki engineer bad ki heh kompeni, hadien ka jing jyrsieh jong ka jingtrei surok kaba na Shillong sha Nongstoin, Rongjeng bad Tura, kaba la mang T.2366.77klur bad katei ka jingujor ejahar, ka la jia ha ka 10tarik Nailur 2024.
Kiba ngat ha katei ka ejahar, ki don 9ngut, ba kynthup ia U B Seenaiah and Company Ltd (Project) Ltd (BSCPL) kaba don ha Kharatabad, Hyderabad, nangta sa ka C&C Construction Ltd, kaba la khlieh da U Charanbir Singh Sethi, kaba ha Gurgaon, Haryana bad ka M’s BSC C&C Joint Venture kaba don ha Gurugram, Haryana.
Kiwei pat kiba shah ujor, ki kynthup ia u MR Sangma Chief Engineer barim, ki Chief Engineer, kiba ha shwa jongu bad sa kiwei de ki nongtrei PWD, kiba don ha katei ka por jong ka jingai kontrak ia katei ka kam, kaba la khot tender da ka Ministry of Road Transport & Highway, ha u snem 2010 bad la ia mynjur bad ka M/S BSC C&C, ha ka 21tarik Risaw 2011, ha ka dor kaba T.1303.83 klur bad la pynthymmai bunsien ia katei ka kontrak, haduh ba kan poi sha ka dor kaba T.2366.77klur, ha kaba ia ka kam la pyndep, ha ka 15tarik Nohprah 2017, kaba la slem haduh 3 snem, na ka por ba la buh.
Ha ka ejahar, la sngewthuh ruh ba kitei ki kompeni, ki bei pisa, na bynta ki jingai sngewbha sha ki heh ki hain jong ka sorkar jylla, ha katei ka por, ba kynthup ia ki ophisar, ka jingthied baje kiba remdor, ka jingsiew pisa sha ki Engineer, na bynta ka Engineer’s day ha Polo Tower, ka jingthied da ka kyiad kaba remdor (black dog) ia ki heh ki hain, ka jing iabam sngewbha ki nongtrei PWD ha Bamboo Hut Restaurant, ka jingthied mobile Tab, kiba remdor bad sa shibun bah kiwei de ki jingpynlut kai ia ka pisa paidbah.
Phi don ban ong eiei?