Yn wan biang ka sorkar synrop ha jylla

Ka elekshon MLA, ka la kut, lyngba ka jing ia thep vote, kaba la pynlong ha ka 27tarik Rymphang 2023, hynrei na ki lad khubor, kiba la iohlum, la sngewthuh, ba kan wan biang ka sorkar synrop ha ka jylla; tangba ngim tip pat, la kiei ki seng, ki ban ia synrop ha ka sorkar thymmai.

Ka NPP, ka la dep kob lypa, ba kan thaw sorkar marwei, lane ba kan jop haduh 34 ngut ki MLA jongka bad ka BJP pat, ka la kob lypa, ba u myntri rangbah ba thymmai, un dei na katei ka seng bad wat ka Congress, ka bym don uwei ruh U MLA, ka ia kob lem hi kumta bad nangta ka UDP ruh ka shim ba kan ialam ia ka sorkar, ha kane ka kynti.

Hynrei na ki jingshisha, kiba paw ha kine ki sngi, ka pyni, ba ki seng rit lane ki tit, kin ioh ia ka doh pasoh ha kane ka sorkar thymmai, ha kaba ki seng heh, lada dei ka BJP, NPP, TMC, kin hap ban thied rem ia kitei ki MLA, lane kin hap ban leit pyndem ialade, mar ia wan ka sngi niew vote, ha ka 2tarik Lber 2023.
Ha katei ka jingkhein, ki seng sain pyrthei, ki riew paidbah lane ki sengbhalang, ki dei ban shim tang kawei ka rai, kaba shai bha bad kata ka long, la ki kwah ia ki seng trai ri, lane ki seng India, ba kin synshar bad ka sorkar thymmai, ka dei ban wan, ha katei ka mat haneng.

Kumba la iakren ha ki khep, ba ladep, ka jingtrei kam jong ka sorkar, kam dei eh, tang ban sam pisa kaba T.1,200 ha ka shibnai, lane ban ai pisa, ia ki kynthei kiba ia poi kha, lane ban phah leit skul ei ia ki khynnah kynthei bad kiwei pat ki mat; hynrei, ka dei ban shim ia ki mat kiba kongsan, kiba ktah ia ka iap ka im ka jaitbynriew, kum ka pyllait dewiong, ka ktien Khasi, ka ILP, u pud u sam, ka khyndew ka shyiap bad kiwei de ki mat, kiba dei ban iada ia ka jinglong kyrpang ka Ri Khasi Jaintia.

Lyngba ki jingshisha, kiba la paw ha shwa ka elekshon, ka pyni ba ki seng sain pyrthei bapher, ki la ngiah ia ka NPP; hynrei ngim tip, la ki lah ne em ban ia khlad bad katei ka seng bad thaw sorkar hapdeng ka BJP bad ka UDP lane ka TMC, UDP bad ka Congress.
Ka long kaba donkam bha namarkata ia ki seng sain pyrthei, ki sengbhalang bad ki riew paidbah ruh, ba lada ka don ka lad ban lum lang ia baroh ki seng trai ri, ba kin thaw ia ka sorkar synrop.