Yn iakhun ka KHADC ha Supreme Court, ia ka ishu kam pud ki ar jylla

Ka ishu ia pynbeit pud jong ka Meghalaya bad ka Assam, ka la poi, sha ka jinglehrain kaba khraw, ha kine ki sngi bad katei ka la paw shai tyngkrein, haba wat ka Khasi District Council ruh kam shaniah shuh bad kam pdiang hi tdot, ia katei ka soskular U Conrad Sangma bad U Himanta Sarma.

Hynrei halor kane ka mat, ka wan ka jingkylli, kaba kongsan bha bad kata ka long, ba kine ki ar tylli ki seng, kiba don bynta ha kane ka jyrwit jyrwat, ka UDP, NPP; la iohi pynban, ba ki leh ialade kum ki lymbit bad kata ka long, ba ynda poi sha District Council, ki ia pyrshah pynbeit pud, katba ynda poi sha ka sorkar jylla, ki sngap jar jar bad kim nud saham satia.

U bah TW Chyne, uba dei U CEM bad U bah Gigur Myrthong, uba dei U Deputy CEM, ki dei na ki ar tylli ki seng, ka UDP bad ka NPP bad kitei ha District Council, ki ia shongshit ban ialeh mukot duma bad la iohi ruh pynban, kumba ki ia sylla lang bad ki MDC jong ka seng Congress; katba ki nongialam jongki pat, lada dei U Conrad Sangma, U bah Prestone Tynsong, U bah Metbah Lyngdoh, U Ma Lahkmen Rymbui; ki pdiang hun mynsiem beit, ia katei ka soskular pynbeit pud bad kitei ki saw ngut, ki dei ki nongialam jong ka NPP bad ka UDP bad ha ka rynsan ka dorbar jylla, kim ia wohnia wohdaw satia, hynrei ki ia beit ha kawei ka jingmut.

Ka la dei ka por, ia ki nongialam jong ka UDP lane ka NPP, kiba don ha Khasi District Council, lane ha ka sorkar jylla; ba kin kren shai, la ki da pyrshah shisha ne em ia kane ka soskular pynbeit pud; lane ioh ki shu leh mynleh ban pynbieit briew, khamtam ha kane ka por pynkhreh elekshon MLA.

Ngim ju lah ban klet, ba ha ka jing kynnoh khaii tuh dewiong, ba ka UDP, ka ieng pyrshah, ha khmat u myntri rangbah bad ka dei halor katei ka mat, ba la pynhap shuki kam poh iing, ia U James K Sangma bad mynta ruh, lada ki pyrshah MOU, ki la dei ban leit da katei ka buit kaba shai ba shit; hynrei lada ki leh pynban, da kato ka buit iehnoh kam bad sa weng pat hadien (kaba leh U Ma Rymbui, ha ka por ba iap U Bah Cherish); ka la shu kylla long noh, tang ka kam leh komik suda bad ka bym don jingshisha satia.
La ju tip ruh, ba ka UDP, ka dei ka khun khadduh jong kane ka sorkar bad ia kata ngi kynmaw, ba ha elekshon Lok Sabbha, ba ladep; ka NPP, ka pynjem toin ialade, haba ka UDP, ka la dep rai lypa ban ia khun ia ka elekshon bad sa phah kyrshan ha ka NPP.
Kam dei tang kata, ha ka elekshon ha Shella ruh, ka UDP ka ieng hi triang marwei bad ka khang lynti ia ka NPP bad hangta ruh, ka NPP, ka iai kohnguh hun mynsiem hi.