Yn horn ne yn nym horn, mih u dak jingkylli

Ha ki khyndiat sngi ba ladep, ka tnat ka kit ka bah, ka sorkar jylla, ka la pynmih ia ka kyndon, kaba khang ban pynsawa ia ki kali lane ban horn, hajan ki hospital, hajan Raj Bhavan, hajan ka Meghalaya high court, hajan ka Meghalaya Secreteriat bad katei (lehse), ka dei ka ain pyrshang jong ka tnat pyniaid kali bad ngim tip, ia kaei ka jingmut kaba don ha ka tnat sorkar bad nangta, ka mih sa kawei ka jingkylli bad kata, ka long “La katei ka ain, kan treikam ne em ha madan”.

Ka jingbuh ia ki horn ha ki kali, ka dei na ka bynta ban pynkynriah, ia ki briew kiba wit ha surok lane ia ki kali, kiba iaid bad ieng khlemakor bad lada ym don ba iaid pynwit ha surok, kumta, yn nym don, u nongniah kali, uba kwah ban shu pynpah horn kai; hynrei tyngkhat, ia ka horn, la ju pyndonkam, ha ka jing ia kren paralok, haba ia kynduh ha surok bad don pat ruh, ki khep, ba ka dei ka daw jong ka jingbitar, haba don ki kali kiba tur khlem akor.

Ka jingkhang ban ai horn, ka dei kaba iahap bha; hynrei, ha ryngkat kitei ki ain, ka donkam ruh, ia ki pulit, ba kin don hajan, namar ba ka Secreteriat, lane ka Civil Hospital, ki dei ki jaka, kiba bun kali bha bad ka mih ka jing kylli, la ki pulit, ki lah ne em ban khanglad ia ki kali, kiba ieng ne iaid khlem akor, ha khmat jong kitei ki ophis, kiba la shah mana ban ai horn.

Don ruh ki kali kiba don ia ki horn, kiba pynpang shkor shibun bad ka tnat pyniaid kali, ka dei ban khang lane ban weng ia kitei ki jait jingpah, namar ba ki pynwit ia kiwei pat kiba iaid ha surok lane ia kito kiba don ha ki hospital, lane kiba shong iing ha ki rud surok.

Ka jingpyrshang kam ju dei kaba sniew, khamtam, haba don ka jingthmu ban teh lakam ia kino kino ki kam beain bad ka jing pynpah horn, ka dei kawei na ki jingmlien ba sniew jong ki draibar bad nangta sa ka jingphrung beain, ha khmat jong kiwei pat bad kitei ki dei ki rukom niah kali, kiba dei ban pynduh jait shisyndon, lada dei ia ki kali jong ki heh ki hain, lane kumjuh ia ki taksi kamai ne ki riew paidbah ruh.

Wei, haba la iakren, ia ka jinghon khlem akor, ka donkam ruh mynta ban iakren bad ban thaw da ki ain, kiba eh, na bynta ka jingniah stet ha ki surok shnong bad ka jingpyntem ia ki jingtem kiba heh sur, ha ki jaka paidbah.