Ym don ba tip shuh, ia ka riam tynrai u Khasi

Don bun bah kiba sngew pyrshah halor ka jingkynthoh jong u nongialam ka TMC, ia ka riam tynrai u Khasi bad don ruh ki seng bhalang, kiba khie bitar ia katei ka jingkren pynjah burom jong utei u nongialam sain pyrthei.

Halor kane ka mat, ka la dei ruh, ba ngin iakren, ba u khasi, um tip shuh, ia la ka jong ka riam tynrai bad ba ym don shuh hi ruh, kiba riam ha kine ki sngi bad ngi dang dei namarkata, ban ai jingiaroh ia ki kynthei jongngi, kiba dei ki nongbat ia ka jait ka khong, ba ki dang pynneh ruh, ia ka riam ka beit tynrai, lada dei ka jainsem, ka jain kyrshah, ka sem dhara bad sa ka tapmoh ryndia saw; hynrei kine ruh la imat, kumba kin nym slem shuh, namar ba la lynshop ka riam khyllah, ki nong sepngi.

Ki shynrang, ki lah ban mynjur, ba kim sngew iahap ban riam man ka sngi, ia ki jingriam jong uba rim, hynrei, ka la dei ka por, ba ngin pyn ithuh ia kitei ki riam tynrai, kum ka jainspong, ka jainboh, haba don ki khep kiba dei ban pyn ithuh ialade ha kiwei pat ki jaitbynriew.
Lait noh ha ka shad ka kmen jong ka Seng Khasi/Seng Raid; ngi iohi, ba ym ju don eiei ban pyni sha kiwei pat ia ki riam tynrai jongngi, kumba leh ki Assamese, ia ka jain kamsha jongki lane ka gamosa ba ki ong bad nangta sa ka jingtap khlieh kaba ki Garo, ki ju pyn donkam ha kiba bun ki khep.

Ka la dei namarkata, ia ka jaitbynriew Khasi, ba kan sdang noh ban jied ia kano kano ka riam, kaba kham suk bad kaba kham ia pdiang paidbah, ba kan long ka riam pyni dak, ia ka jinglong tynrai jong u khun Khasi bad kan shong ha ka jingstad ki tymmen ki san, ba kin jied ia kano ka riam, kaba dei ban ia pyni dak, ia ka jinglong tynrai jong ka riam ka beit u khun khasi khara.

Ia mynta, la ia pdiang paidbah, ban pyni dak, da ka ryndia bad kan bha shibun ia ka tnat thain jain jong ka sorkar jylla, ba kan shna kyrpang noh ia kitei jait ryndia, ba kin long kiba kham rit bad kiba kham tad dor, ba kin ia lah bor ban ia thied paidbah bad lada ki tymmen ki san, ki pdiang ia kitei, ngin ia sdang ban tap noh ia ki shynrang, da ki ryndia tlem ba lieh bad ia ki kynthei, da ki ryndia ba khleh rong (kiba la ju tap ha ki sngi kyrpang) bad nangta, sa ka jainspong, kaba dei sa kawei pat ka rukom riam, kaba la ju pyndonkam ha ki jingleh niam.