Ym don ba kam trai, ia uba iap ha par dewiong

Ka la mih ka jing shah kynthoh kaba jur jong ka sorkar Jylla, ha kaba sdang jong une u bnai, halor ka jingiap jong ki nong bylla dewiong ha Umleng, ha East Jaintia hills District.

Katei ka khubor, ka la saphriang tyngeh, tang na kawei ka tweet jong uwei u dkhar, uba na Silchar, uba kyrteng U Karimul Bari bad ka la pyn kyndit thiah ia baroh ki bor sorkar, kaba kynthup haduh ha Secreteriat jong ka Assam bad ka Meghalaya ruh kumjuh.

Ym tang katta, la ia tip paidbah ruh, ba kitei kiba iap ha katei ka krem dewiong, ki don 5ngut bad la tip ruh bad ki kyrteng jongki.

Katei kam lei lei, hynrei, kaba i lyngngoh ia mynta pat, ka long ba utei uba pynphriang ia katei ka khubor, um shym la thawlad satia ban bud dien, la ki pulit Meghalaya, ki la ioh sei ne em ia ki met iap bad nangta ban wad ia kiba ha iing, jong kitei kiba don kyrteng, ba kin wan shimti, ia ka met iap, kaba la ioh sei mynta la shi taiew eiei bad kaba ka sorkar jylla, ka la kit khia bad pynlut (lehse) da ki klur tyngka, ban jubab ia ka tweet jong utei u bar jylla.

Ngim tip, na ka liang ki pulit IPS ka Jylla, kiba hap ha ka Joint Cadre bad ka Assam, ki la leh aiu ia kane ka kam bad la ki la lap ne em, ia utei u nong tweet bad lada jia ba kim pat lap, ki la dei ban wad shitom ia u, namar ba u dei uba tip bha ia ki kyrteng jongki bad khlem pep, un jin da la tip, wat ia ki iing ki sem jongu ruh bad ha kajuh ka por, ka sorkar jylla, ka la dei hi ruh ban da leh don burom, kumba ka leh ia kito kiwei pat, kiba la iap ha kiwei pat ki krem bad kata ka long, ba kan leit buh ia une uwei uba la ioh sei sha ka shnong jongu bad ba kan siew lut ia ka bai lutksan, kaba ia hap dor.
Kam dei tang katta, kaba kham pyn pyrkhat shuh, ka long ba balei ki pulit ka Assam bad nangta sa ki riew sain pyrthei katei ka jylla, kiba la tynruh ia ka sorkar Meghalaya ba kan wad ia kiba hap ha katei ka krem, ba kim shym la don ka jing sngew kit khlieh ban wad ia ki iing ki sem jong kitei kiba iap bad ba kin wan shimti ia ka met; lane ioh lehse, ki shu don pynban, tang ka jing sngew bang ban thad madan ia katei ka jingjia ha ki social media, wat la ki dei ban sngewthuh shai ba ki par dewiong jong ka Jaintia hills, ki dei ka lad kamai kaba kongsan bha ia kiba bun ki nong bylla bad kumjuh ia ki heh spah nong khaii jong ka Assam.