Ym dei tang ia u sngaid ne u tymmen; dei ban beh kam shwa ia u nongdih

U Saleng A Sangma, MLA jong ka seng Congress, ula leit rah ia ka mat ha iing dorbar jylla, ha kaba ula dawa, ba dei ban weng kam noh ia ki pulit, kiba sngaid, kiba tymmen bad haba sngap, katei ka mat, ka lam byrdei hi, namar ba u nongbeh nongtuh, u nong ia pyni ksah bad ki nongiakhih pyrshah, lane u nongpahara ia ki heh ki hain, lada u sngaid lynjur noh, kumta, um lah shuh ban leh ia kitei ki kam haneng bad u pulit, u dei ban long uba rit kpoh, uba biang ka met ka phad bad um dei satia, uba sngaid jem, uba la kdor ka met bad u bym lah shuh ban khih ban ksar ruh.

Hynrei ngi dang pule kotkhubor, ha ki khyndiat sngi ba ladep, ba u pulit buaid u shoh ia ki nongialam seng bhalang ha Pynursla bad haba ka long kumta, u don u dak jingkylli uba heh bha bad kata ka long, la u kham sniew uba sngaid, uba tymmen, na uba buaid bad kane ka dei ban long ka mat, kaba kongsan bha, ha kaba ka tnat pulit, ka dei ban tuklar noh mardor bad la ju iohsngew ruh man ka por, ba haba la don kano kano ka jing iatyngkhuh hapdeng ki riew paidbah bad ki pulit, khamtam, ha ka por mynmiet, kumta, ka jingujor kaba ha khmat duh, ka dei ka jingbuaid jawsheh jongki bad kane ka pyni, kumba kito kiba trei pulit, ki dei ki nongdih bhor suda.

Kane ka dei ka bih, kaba sniew tam, ha ka tnat pulit bad ka la dei ruh, ia katei ka tnat, ba kan shim khia ban teh lakam lane ban syntiat ia ki pulit jongka, kiba dih buaid, khamtam haba ki don ha ki kam jongki, namar ba kane ka pynsniewdur ia katei ka tnat bad kam dei tang katta, hynrei, ka ktah ruh ia ka koit ka khiah jongki, namar ba ki don bun ki pulit kiba iap kyiad, khamtam, kito kiba trei sha ki nongkyndong.
Kumba la ong haneng, ba ia uba sngaid, dang lah ban phah kam hangne hangtai lane ban pynraikhoh ruh, da ka jingkilan met bad dang lah ban iakren bad ia sngewthuh jingmut; kumjuh ia uba tymmen, u don la ki jong ki nia ki jutang jongu, bad ki buit ki sap jongu, ban hikai ia ki pulit kiba dang shu rung thymmai, ha ka kam; hynrei ia uba dih, te tang shu la ia bud, kumta, kin sa bun kiba ia lyngkrang suda bad katei ka dei ka jingeh kaba khraw tam, haba don ki nongdih, ha kano kano ka iing ne ka ophis sorkar.

Ban pynduh ia kane, ka mat kaba kongsan bha, ka long ba u pulit, um dei ban trei palat na ka por, ba la buh, lada dei 4 kynta, 8 kynta bad kumta ter ter bad um dei ruh ban shong sah, ha kajuh ka jaka, da ki phew phew snem, namar ba u iohlad ban ia khleh bad ki briew kiba sniew ha kano kano ka jaka treikam kaba u don bad ha ki Sngi U Blei, la dei ban ailad ba un shongthait bad la ki khun ki tnga, lane ba un leit jingiaseng, ba un lait na ki jingbunkam, kumba long man ka sngi.