Wat jied shuh ia ki heh spah na Jaintia

U Bah Sanbor Shullai, MLA ka South Shillong, ula tangon na shata dar bad kata ka long, ba ula ther tyngeh, ha ki khyndiat sngi ba ladep, da kaba u ong, ba ym dei shuh ban jied nongmihkhmat, ia ki heh spah, kiba na Jaintia hills, kiba leit pynbieit bad jop elekshon sha Ribhoi.

Utei u rangbah, um shym la jer kyrteng satia iano iano ruh, hynrei, lehse u thew ia ka iing ka sem jong U Ma Ngaitlang Dhar, namar ba ialade, ula jop elekshon teng na Umroi ha u snem 2013, katba u khun jongu, pat na Mawhati ha u 2018 bad nangta sa kiwei shuh, kiba katei ka iing, ka la pynjop elekshon, ha ki khyndiat snem ba ladep.

Ka jingkren jong U bah Shullai, ka iahap bha ha kane ka kynti, namar ba ka seng jongu, ka BJP, ka dang shu dep rai, ban pynduh jait ia ka politiks, na kajuh ka iing bad khlem pep, haba u sangoh ia ki heh spah na Jaintia hills ruh, u thew beit ha kajuh ka sohpdung, kumba ka seng jongu, ka dang shu dep rai na Hyderabad; hynrei, U bah Shullai, u sngew lehrain pat (imat) ban kynthup lang, ha ka jingkren jongu, ia ka iing kaba kham heh jong ki riew sain pyrthei, kaba dei ka iing jong U Conrad Sangma.

Ban iatai ia katei ka mat, ka long kaba jyrwit shibun, namar ba ha kine ki sngi, ngi ioh ia ki nong mihkhmat, da ki donlak don putit suda, lane da ki heh pla bad kim dei shuh ki heh jabieng bad nangta, ngi don ia ki nong mihkhmat kiba dei ki nongkhaii, nangta ki shakri sorkar, kiba la shongthait na ka kam bad kitei ki la pynjaboh ia ka jinglong kyrpang ka kam shakri paidbah, namar ba ki khanglad ia ki riew donsap, ba kin long ki nongthaw ain, kiba tbit jong ka dorbar jylla; da kaba ki bret maphot, da ka tyngka pliah.

Haba shu peit na ka jingkren U bah Sanbor Shullai, ngi lam iohi, kumba ka don ka jingshisha, namar ba kat ka spah U Ma Ngaitlang, hynrei, ha ka sien ialeh ha u 2018, u shah pynliem noh na ka Umroi Constituency bad mynta pat la iohi, ba u khun jongu, U Ma Dasakhiat Lamare, ula sdang sma dien, ia kajuh ka jingma, kaba u kpa jongu, u iakynduh bad kumta, ula kyntait noh ia ka Mawhati bad ula sdang leh juh lehjan ialade bad ki briew ka Nongkrem Consti tuency bad katei ka pyni shisha, ba kitei kim don ia ki ishu, hynrei ki don tang ka kam shna pisa.