Wan tuklar ILP, sa U MLA na Assam

Ka ishu ILP, ka la dei ka mat, kaba jan baroh ki sngew tynnad bha ban iakren bad ki sengbhalang, ki seng sain pyrthei ruh ki bang bha, ia katei ka mat ILP, hynrei ha kane ka kynti, u don sa uwei uba kham bang pher bad uta u dei U MLA, uba na Assam, uba don hi, ia la ka jong ka jingai jingmut sha ka sorkar Jylla, halor katei kajuh ka mat.

Ka Meghalaya, ka ioh ia ka kyrteng jongka, na ka jingjer kyrteng jong uwei u khar Bengalee, la iathuh bad kumta, ki khar Bengalee ruh, ki sngew trai bha ia kane ka jylla U Khasi Jaintia, Garo.

Ym ju kham iohsngew ia ki MLA jong ka Meghalaya, ba kin leit sha Assam, ban iakren ia ki jingeh kiba mih na ka por sha ka por bad ka Assam, kam don por hi ruh, ia kitei ki jingiakren, ha kaba wat ia ka ishu jong u pud u sam ruh, mynta la ar snem shiteng (naduh ba thaw ia kane ka sorkar U Conrad Sangma), kam ju don satia kata ka jing ia kynduh ban iakren.

Hynrei hangne ha ngi, tip na kano ka daw, tip, ba ka dei ka tribal state lane ba ju don kiba ong ba ki tribal, ki dei ki riew sahdien, ne tip ba ka dei ka jylla, kaba ieid lut kat ia uba wan, la iohi, ba ki briew kiba nabar, ki sngew tynnad bha ban tuklar ia ki kam poh iing ka Jylla.

U MLA na Assam, u sngewthuh shai ba U Conrad Sangma, un lah ban nym pyn sngap satia, wat tang shiliang ka shkor ruh, halor ka jing pyrshah ILP jongu, hynrei u kwah ban pyni pat sha ki jaitbynriew Bengalee, ba u dei u riew nud ban leh eiei halor ka jingeh ki jaitbynriew lajong.

Ym tang mynta, hynrei la iohi ba ki MLA na Assam, ki ju wan khah khah sha Shillong ban iakren halor ki jingeh jong ki rit paid, halor ki ishu bapher bapher.

Lada iakren kham jrong ia kane ka mat, ka wan pat ka jing pyrkhat, ba lada sha Shillong, ki ju wan khah khah, te balei pat ba kim nud ban leit sha Aizawl, haba don ka jing ia kynad kam pud ban leit byrthen ia U Zoramthanga, lane balei ba kim leit sha Nagaland ruh na bynta katei hi kajuh ka mat bad kumta ter ter.

Ki jylla jong ka thain shatei lam mihngi, kynthup ia ka Meghalaya, ki la dei ban pyrkhat jngai ia ka jing tuklar ki briew na Assam, ha kaba ki nud wat ban khang ia ki kali kit mar bam, tang na ka daw, ba ki sngew wit ia kito ki jylla bad katei ka dei ka jingleh kaba wat ka sorkar India, ka hap ban pyrkhat jylliew bha.