Ujor ki BSF, ba jur ki kam pyntriem shakhappud Bangladesh

Sngew sammut, ba haba u leit poi u myntri ka sorkar India sha Dawki, ba da ki shakri jongu, ki leit ai dorkhas pynban, ia ka jinglong jingman jong ka thain bad kata, ka dei ba ki shipai BSF, ki leit ud leit nam, ia ki jingeh, ba ki iakynduh sha khappud jong ka India bad ka Bangladesh.

Katei ka jingkren jong ki shipai BSF, ka lah ban pynkyndit pynban ia utei u myntri, haba ka sorkar India, ka ju shim, ba ka Bangladesh, ka dei ka ri, kaba ki iajan paralok bha, kaba kohnguh sneng bad ba ka khaii pateng, ka iaid bha na baroh arliang.

Kane ka jingleit dorkhas jong ki shipai khappud, ka long da khongpong, lada iakren bad ki jing shisha, kiba jia ha madan, namar ba ki BSF, ha kine ki sngi ba la don lei u sainar shiah, kim ju don shuh satia sha khappud bad kito ki jaka kiba hap shabar u sainar, ki la shu ai bam ei ia ki khar Bangladesh bad ia katei ka jingleh jongki; tip, ki iathuh ne em ia u myntri ne ioh lehse ialade ruh ki tieng pynban ia ki nonglute na Bangladesh?

Ki BSF, ki dei ma ki, kiba kwah sainar shiah palat bad ki shait tynruh man ka por, ia ka sorkar India, halor katei ka mat; hynrei mynta, haba ki la bun ki jaka ba la dep ker sainar (khamtam sha Riwar Khasi), kumta, kin dang sahnud, sa ia kaei pat, haba mynta lei ki la sdang ban poi pahara sa sha ki shnong ki thaw jong ki briew bad ym dei shuh sha ki mawpud.
Ym tang katta, mynta, kin pahara shuh sa ia kaei, haba wat ia ki iew khappud ruh, ki la lah ban pynsngewthuh ia ka sorkar India, ba dei ban khang beit sbak bad mynta, ki iew kiba kongsan sha ka thain Riwar, ki la shah khang lut khait bad kam dei tang katta, ki dei ma ki ruh, kiba don bynta ban ngiat ia ka shnong Lyngkhong bad ka madan Lyngkhat sha lyndet u sainar shiah.

Ki nongialam ka jylla, lada dei ki MP, MLA, MDC, ki Syiem, ki Sirdar, ki dei ban husiar bha, ia kiba kum kine ki jingai khubor jong kine ki shipai, kiba pynthut shibun, ia ka jinglong jingman jong ka thain, namar ba ka tnat kam pohiing ka sorkar India, ka ju shah ialam bakla, ha kine ki rukom biah phongrai jong ki shipai khappud bad ki dei lyngba kine ki jait khubor, ba ki nongshong khappud, ki shah set ialade ha ki ruhnar jong u sainar shiah, ha kaba tang ban iaid ban ieng ruh, ki shah teh kyndon, ha ki shipai khappud.