U Syiem kampher, la dei u maw, ka hima kit u rit u khraw

Ha kaba kum kane ka apot jong ka khim khait, jong ka jing ia kajia kam pud hapdeng ki Hima Khasi bad ka sorkar Meghalaya, kaba iatreilang bad ka sorkar Assam, ka wan shat kane ka jingmut, kaba ki shait ong “U Syiem kampher la dei u maw, ka hima kit u rit u khraw” bad kam kut tang katta, hynrei ka wan shat shuh, kajuh ka jingmut bad kata ka long, ba ka Hima Khad sawphra, ka hap ban shong dorbar ar sngi kynthih, ban ai jaka tih surok ia U David Scott, ha katei ka por.

Mynta pat, kine ki Syiem, la iohi, ba ki bunkam ban leit wad Chief Executive Member (CEM), ban leit wad ia ki myntri sorkar, ia u myntri rangbah bad kumta ter ter; hynrei ka jingkylli, ka long kaba suk bha ban iatai bad kata, ka long “mano ba aibor ia ki, ban leh kumta?”

Haba iathied ia die jaka, uno uno u trai jaka shimet, kitei kijuh ki briew, ki ju wan ha khmat ban dawa, ia ka bai thoh jaka, bai shon muhor bad kumta ter ter; hynrei mynta pat, la iohi, ba ki sngap jar jar, naba ki ia tyngkhuh bad kawei pat ka bor, kaba khlain ban ia ki.
Kam lei lei, hynrei, ka mat, kaba ngi hap ban iakren, hangne, ka long ba ha kat kane ka saw ka sian, kumno ka Hima Mylliem, kam lum ia ka dorbar bah jongka, kaba kynthup haduh 5, 6ngut ki MLA,MDC ban buh ia ka agenda ha khmat jong ka dorbar, halor kane ka jingshah kurup jaka, ha ka Assam (kumba la pyni ia ki jaka jong ka them Marwet, Khanapara bad kiwei kiwei).

Ym tang katta U Syiem Jirang, U Syiem Nongspung, U Lyngdoh ka Sohiong, balei ba kim nud ban lum ia ka dorbar jong u paidlang jong ki hima jongki, ban buh ha khmat ka dorbar; halor kane ka saw ka sian, kaba kin duh noh ia 18 kilometre sawdong ka jaka, ha ka soskular jong U Conrad Sangma bad U Himanta Sarma.

Ka la ju don bunsien, ka jing iakren halor kane ka jingleh bym salia jong ki Syiem, ia u khun u hajar jong ka hima; hynrei haduh mynta, la iohi, ba ki Syiem ki tieng thot thot bad leit sha ki dorbar hima bad wat ka District Council, kaba peit ba i, ruh, kam nud satia ban hukum ia ki khlieh nongsynshar, ba kin lum ia ki dorbar hima bad ka dei na kata ka daw, ba ki Syiem jong kine ki sngi, ki shu long niangkohnguh bad shah hukum bad ki shim rai ia ki kam hima, da kaba ki iasyllok bad ki paralok ba ki ia sngewjan.