U Syiem kam pher, la dei u maw, ka hima kit u rit u khraw

Haba ngi kynmaw, ia ka lyngkhuh sngi iap jong U Tirot Sing Syiem, kam da donkam shuh, ba ngin iakren shaphang ki jingjia, kiba la dep jia, ha kitei ki snem, kiba u don ha ka jingsynshar, lane ha ka jing shah kem bad shah set phatok jongu ha Dhaka, haduh ba un da iap syndon hapoh byndi; hynrei ka mat, kaba donkam, ba ngin iakren, ka dei halor ki kyntien, kiba ong “U Syiem kam pher, la dei u maw, ka hima, kit u rit u khraw”.

Katei ka kyntien, ka iahap bha, ha kine ki sngi, namar ba ngi iohi, ia bun bah ki jyrwit jyrwat bad ki kynrum kynram, ba la leh hangamei, da ki Syiem, ki Sirdar, ki Rangbah Shnong bad kumta ter ter.
Ha ki khyndiat sngi, ba ladep, ngi iohi, ia ka jingujor pyrshah ia ka Hima Mylliem, ia u Syiem ka Raid Marwet; halor ka jingioh bor ki Garo, ban long Rangbah Shnong, ka jingdie lilam ia kiba bun ki jaka ki puta, sha ki briew kiba nabar bad kitei ki jia, namar ba la rai donbor, da U Syiem marwei lane bad ki katto katne ngut, kiba ha syndah jongu.

To ngin ia kynmaw, ba U Syiem Tirot Sing, u da shong dorbar, haduh ar sngi kynthih, na ka bynta, ban ioh ia ka jingmynjur jong ki rangbah rangsan jong katei ka hima, ha shwa, ba un ai jingbit, ia U David Scott, ba un thaw surok sha ka Hima Khad sawphra bad katei ka kdew shai, ba utei U Syiem, um shym la leh, da la ka jong ka bor shimet jongu, hynrei, u iaid ryngkat bad ka dorbar jong ka Hima Khadsawphra.

Mynta kitei ki dorbar, ki la duna bha bad lah ban ong, ba dei tang ki Rangbah Shnong lane ki Sirdar, kiba dang bat ia katei ka rukom treikam bad ka dorbar; hynrei ha kiba bun bah ki khep, la iohi, ba U Syiem hi marwei, lane tang bad kiba khraw jongu, ki leh ia ki kam, kiba ktah ia ka hima bad ia u khun u hajar bad ka dei na kane ka daw, ba ki Hima Khasi, ki la nang tlot bor bad ki nang shah nion, na ka por sha ka por, ha ka District Council, ha ka sorkar Jylla bad wat ha ka sorkar India.

Ka la dei ban don ka kynhun jong ki riew shemphang, ki ban leit ud sha ka District Council, kaba ri ba sumar ia ki Hima Khasi, ba kan bthah ia ki Syiem Khasi, ba kin pynlong thikna, ia ka dorbar jong u khun u hajar, ha kaba kin shim ia ki rai kiba ktah ia uba bun balang, ba kin ai jingkhein ia ka ioh ka duh bad ba kin pyn ithuh ruh ia la ka long Syiem man Syiem bad kan jin da la bha, ba ia u khlieh jong ka Hima, yn jied da uba bun balang, ym da ki khyndiat ngut, lada dei na ka kur ne na kano kano ka longiing bad katei kan dei ka synshar paidbah ba pura.