U Sunak bad ka Lizz, ki iaknieh shuki myntri rangbahduh ka England

U Rishi Sunak, u don ha ka jing iaknieh ia ka shuki myntri rangbah duh jong ka England, ha kaba u iakhun pyrshah ia ka Lizz Truss bad katei ka jingiakhun, ka dei hadien ba U Boris Johnson, ula hiar shuki noh kum u myntri rangbahduh bad u nongialam jong ka seng Conservative.

U Sunak, u dei u nong India, ha kaba ki kmie rad jongu, ki dei ki hindu kiba na Punjab bad ki kmie ki pa jongu, ki leit sah sha East Africa bad sha England bad la kha ia u ha England, ha kaba u don mynta 42 snem ka rta.

Ha kane ka jingjied ia u myntri rangbahduh ba thymmai, kim dei satia ki MP, kiba jied ia u, hynrei, ki dkhot jong ka seng Tory lane ka Conservative, kiba don ha kylleng ka England, kin jied ma ki, na kitei arngut kiba bit duh bad katei kan dei da ka jingthep vote secret ballot.

Kam dei tang kata, hynrei, ka da don ka jing ia tainia, ha kaba ki nongthoh khubor, kiba pawnam bad kiba rangbah jong katei ka Ri, ki tih jylliew halor ka jingthmu jong kitei ki nongialam, na bynta ka shuki myntri rangbah duh bad ha ka jing ia tainia, kam mih satia, ba U Rishi, u dei uba wan shu wan shongthap sha England, lane ba u dei u nong Punjab bad kam mih satia, ba u dei u hindu (ha katei ka ri jong ki Khristan) bad kam don ruh ka jing iatainia ban khanglad ia u, namar ba ka tnga jongu, kam dei ka nongshong shnong ba pura jong ka England bad ba kam siew khajna ia katei ka ri.

Ki jing ia tainia hapdeng kitei ki arngut, ki dei halor ka khaii pateng, ka jing iadei hapdeng ka UK bad ka Russia, halor ka thma Ukraine, ka jingkyntiew ia ka ioh ka kot bad ka rukom oh khajna jong U Rishi, namar ula long teng u myntri pla pisa jong katei ka Ri bad kam dei tang kata, ka don ruh ka jingiakren ia ka jingai jing iarap ia ki longiing, da ki jingsop iing lane ba ki khot loft insulation, kiba dei ki jingiada na ka jingshit ha ki iing ba shong briew, ha kaba ka sorkar kan bei pisa.
Ngin dang ia peit ia uba jop ne uba rem, ha ka jing iakhun, hynrei, kaba i hun mynsiem, ka long ba ka synshar paidbah, ka khraw palat ha katei ka Ri, ha kaba ia u myntri rangbahduh, ki hap jied, da ki nongtrei jong ka seng kaba don ha ka sorkar bad nangta, ba ia ka jingtbit jongu, ym shym la shim, ba u dei na ka jinglong trai shnong ne jinglong niam, hynrei halor ki mat kiba dei ia ka roi ka par.