U Prah, ula rai ban iakhun MP, sa mano ki ban mih madan?

U Prah, lane ka seng VPP, ki la dep rai, ba kin iakhun ia ka elekshon MP, ha u snem 2024, kaba dei ban long, sa kumba shiphew bnai antad bad katei ka seng, ka la sei da U Dr Ricky AJ Syngkon, uba dei uwei na ki nong hikai ba paw ha ka North Eastern hills University (NEHU).

Kat haduh mynta, ngi dang tip, tang ia utei uwei u kyrtong, uba la dep rai bad ngim da tip shai, la U Ma Vincent Pala, uba dei U MP, ba dang bat mynta, un iakhun biang ne em bad la un iakhun na ka seng Congress, ne na kawei pat ka seng?

Ka jingkhmih lynti, ka long, ba ka seng NPP, ka UDP bad ka BJP ruh, ba kin sei kyrtong ha kane ka sien, ka ban sa wan bad lada ka long kumta, ka don ka jingkyrmen, ba kin mih kumba 5 haduh 6ngut ki kyrtong MP bad kan long ka jingiakhun, kaba jwat shibun, namar ba kitei ki seng, ki dei kiba la paw bha ha u paidlang ha ka jylla.

Ha ka elekshon, ngi lah ban ong, ba ngi donkam ia ki stad, hynrei, katei kam kut tang katta, namar ba ngi don mynta ia U Ma Vincent Pala, uba dei u Bachelor of Engineering, ngi don sa ia U Dr WR Kharlukhi, uba dei u nong hikai Kolej, kiba dei ki arngut ki MP jongngi, hynrei ngi iohi ia ka rukom treikam jongki, ka bym donkam shuh ban iatai bniah.

Ha ka elekshon MP, khamtam, ha kaba kum kane ka khep, kaba ngi donkam eh, kam dei than ia ka dur ka dar lane ia ka kyrteng jong u kyrtong; hynrei ngi donkam ruh ia ki mat jong ki seng sain pyrthei bad kaei kaba ki don ban tyrwa, ha kane ka kynti bad ngi dei ruh ban sngewthuh ba ki don ki ishu, kiba dei ban iakren sha Lok Sabbha, hynrei, kim dei satia, ba ngin iakren ha dorbar Jylla lane ha District Council bad kaba donkam, ka long ba ka VPP, Congress, NPP, UDP, BJP bad kiwei ki seng, ba kin sei noh, ia la ki jong ki mat elekshon jongki, ha shwa, ba kin jied ia ki kyrtong jongki bad ba kan pynsuk ia ki riew shemphang, ba kin rai shano kin kyrshan.

Ki mat kiba kongsan eh, ia mynta, ki long halor ka jingpynbha ia ka Sixth Schedule, ka ILP, ka ktien Khasi, u Uranium, ka lynti rel sha Byrnihat, ka Uniform Civil Code (UCC) bad kumjuh ia ka Block 1 & Block 11, kiba ngi la tip bha, ba kumno ka Assam, ka la shu rah jubor ia kiba bun bah ki jaka jong ka Block II sha Karbi Anglong, ha u snem 1951, khlem da burom ia ka soskular jong ki Syiem Khasi bad ka sorkar India.
Haba shu peit khai, la imat, kumba kane ka elekshon MP, kan kham bun ki kandidet; hynrei ka donkam pat, ba ngin tip ia ki mat, kiba ki la pynkhreh, na bynta ka jaitbynriew Khasi Pnar, namar lada shu jied parti, khlem ishu, kan nym poi satia shaei shaei ruh.