U Mukul Sangma, un rung BJP?

Ka pyn lyngngoh ia kiba bun, kiba don ha ka lympung sain pyrthei, haba U President jong ka seng BJP, ha ka jylla, u khot sngewbha ia U Mukul Sangma, ba un rung sha ka seng BJP.

Ka dei ka jingjia, kaba ym sngew lah mutdur satia, ba kumno, utei u heh BJP jong ka jylla, un khroh un kjor ia utei u heh Congress, ba un rung sha katei ka seng; haba dang ha ka elekshon 2018; ki nong ialam jong ka seng BJP, ki la thad tyrkhong ia utei u myntri rangbah barim, da kaba ki kynnoh, ba u dei u briew, uba bam sap tam ha ka Ri India baroh kawei bad katei ka dei ka jingkren jong U Nalin Kohli, uba dei u nong peit jong ka seng BJP ia ka Jylla, ha katei ka por.
Ym tang katta, ki heh jong ka BJP, NPP, UDP bad kiwei, ki la khoh snep hi plain, halor ka jing khang dewiong, ha kaba ki kynnoh, ba U Mukul Sangma, um lah ban iada ia katei ka ain khang dewiong jong ka NGT bad ki da kren kob sob, da kaba buh por, kumba 6,7,8 bnai, ba kin pyllait ia u dewiong, lada ki ioh ban thaw sorkar ha ka jylla.

Mynta, haba ki la ioh shisha ban thaw sorkar; ka la dei ia u heh BJP jong ka jylla, ba un dawa ia U Conrad Sangma, lane ia U Narendra Modi, ba un phah tohkit mardor halor kitei ki jing kynnoh bamsap jongu, ia U Mukul Sangma bad lada un jin da la leh kumta, khlem pep, ka la mih ka kaiphod ha kine ki sngi bad lada ka la dei shisha, utei u myntri rangbah, ula dei ban shah pyn ngat ha ki kyndon ba tyngeh jong ka ain.

Kane ka jingleh, ka long kaba da ijli sat haduh katta katta, ba ia u briew, la shu pyn budnam kai, katba ka khlem don kano kano ka jingwad ia ka jing shisha, lane ka jing pynshitom; bad kam dei tang katta, hynrei, ia utei u juh u briew, uba la kynnoh, ba u dei uba tuh, uba bamsap, hynrei lada u mynjur ban pyn iasoh bad ka seng lajong, la pynduh pyndam lut ia kitei ki jing bamsap baroh bad katei ka dei ka jing shisha, kaba ngi iohi, wat ha Delhi ruh, haba ka jingthad madan bad khoh snieh jong ki heh BJP, ia ka iing jong ka Sonia bad U Rahul Gandhi, ka long kaba la jubor tasam haduh katta katta, ha shwa ka elekshon 2014, hynrei ynda ki la jop, kim shym set phatok ia ki shi kmie shi khun, hynrei ki nion pynban ia u paidlang ka Ri, da ka jing pyn duh pisa ha u snem 2016.