U hindu, u myntri rangbahduh ka UK

U Rishi Sunak, uba long niam Hindu, un dei u myntri rangbah duh ba nyngkong eh jong ka England (United Kingdom) bad ha ka sien nyngkong ruh, ba yn don u lam dohiong kum u myntri rangbah duh jong katei ka Ri bad kan dei ruh ka sien nyngkong, ba kan mih bujli, da ka kyrteng Rishi, ha ka jaka ki Lizz, ki Boris, ki Theresa, ki David bad ter ter.

Haba iakren ia ka sain hima sima ha England, ka don ka jing iapher kaba khraw bha, na kaba long ha India bad kata ka long, ba ki MP, ki peit ia ka jinglah jong u nongialam bad kim ju kyrshan satia, ia la ka jong ka parti ruh bad hap ban pynkynmaw, ba ka Lizz Truss, ka long myntri rangbah duh, tang shibnai shiteng; hynrei, ka hap hiar shuki noh, namar ba ka bakla ban pyniaid ia ka jingbuh khajna bad katei ka ktah bad pyn bitar ia u paid ka England.

Ym tang katta ha England, la iohi, ba ka ktien, ka dei ka waitlam arliang syrti, namar ba wei ba la shah thalain ha ki kotkhubor, kumta ka shithi resain, la dei ban thep lypa hapoh pla.
Haba iakren ia U Sunak, la sngewthuh ba ki kparad kmie rad jongu, ki dei na Ludhiana, hynrei ia u kpa jongu la kha ha Africa bad ia U Sunak, la kha ha Liverpool bad kumta ka jing iasnoh jongu bad ka jinglong nong India, ka la pajih shibun eh.

Kam dei tang katta, hynrei, kaba lyngngoh, ka long ba ka England, ka dei ka Ri jong ki Khristian, ha kaba ka Church of England, ka dei ka niam jong katei ka Ri, hynrei, ba u hindu, un long u myntri rangbahduh jong katei ka Ri, ha kaba ka jingdon ki hindu ha England, ka long, tang kumba shi million ngut lane shi bynta, na ka hynriew bynta jong ka jingdon ki jaitbynriew jong ka Ri.

Kam lei lei, katei ka dei ka jingjia, kaba jia ha ka Ri, kaba khraw bor tam ha ka pyrthei bad kaba la synshar ia kiba bun bah ki Ri, ha ki snem 1900 (bad wat haduh ha kine ki sngi), lyngba ka Syiem Bilat; katba ha India, haba iakren ia katei kajuh ka mat, ngi iohi, ba ka Sonia Gandhi, ka don ia u lok, ki khun, ki ksiew; hynrei, haduh mynta, ka dang shah kynshi kyneh, ba ka dei ka nongwei na Italy bad wat ki khun jongka ruh, ki ju shah sin shah rngop, ba ki dei ki nong Italy bad katei ka dei ka jingiapher jong ka synshar paidbah, hapdeng ka Ri kaba la synshar bad kaba la shah synshar, 75 snem mynshwa.