U dieng sympat

Kumba 30, 40 snem mynshwa, ki shnong ki thaw, ki kper ki phrah bad ki phyllaw ki mynshem bad wat ki iing ki sem ruh, ki bun ki iing dieng lane kiba tap da ka tin bad kitei ki dei ki iing jong ki briew kiba don ba em bad don khyndiat ngut, kiba ioh tei paki dulan bad kitei ki dei ki dap lak dap putit bad wat ia ka shet ka tiew ruh, ha katei ka por, la ju pyndonkam bha da u prew bad ka diengiap bad wat haba leit painkhana ruh, ki bun kiba dang pyndonkam da ki siej kiba thlieh rit bad kumta ha katei ka por, ki shken kiba thlieh rit, ki dieng kiba thlieh rit ki bun byllai bha.

Ha kitei ki por, ki nonghikai ruh, ki buh da ki siej kiba rit hajrong miej bad kitei ki dei ki siej sympat briew.
Ha iing ha sem, ki kmie ki kpa, ki dang smat bha ban phah kam, ia la ki jong ki khun, ha ki por shuti, ha shwa ban leit skul bad ynda la wai skul ruh kumjuh bad ka por khreh kot, ka ju long; ynda la pyndep ia ki kam iing kam sem.
Ym tang katta, ha kitei ki por, mar iadep kam iing, ki khynnah rit bad wat ki khynnah heh, ki la ia mareh bad ia kynthih kylleng ka shnong ka thaw, ha ki madan madiah, ha ka iabeh, ka ialehkai bun jait bad wat ka ialympat bad iashoh para khynnah, ha kaba kiba kham heh, ki kham shim kabu, ban nion ia ki kiba kham rit.

Ha katei ka por, u diengsympat, u dei uba khlain bor bha, ha kaba lada ym treikam bha ha iing ruh, ki kmie ki kpa, ki la lah ai da u dieng sympat, tang shu leit shang palat sharum shaneng; hangta ruh, lah ngat ha u dieng sympat bad wat ha skul ruh, ki nonghikai, ki ju sngewbang ban phah plied bha, ia la ki ksang kti bad ki sa sympat sbak sbak haduh ban da saw bylliang ki kti bad wat ki khohwah ruh, ba dang dei ka por ia phong patlun lyngkot, ki nonghikai, ki ju bang bha ban sympat, ia kito ki bym lah ia ki lynnong kot jongki.

Ha kitei ki por, u dieng sympat, um long kyrpang iano iano, hynrei, ki khynnah shynrang ne kynthei, kim lah lait na u dieng sympat, ha ki kmie ki kpa, ki nonghikai bad wat ha ki iingmane ruh bad ka bor jong u diengsympat, ka ju pynkyndit bynriew, wat ia ki khynnah runar.

Mynta ba la tei da ki iing dewbilat, ba ki kynroh ruh, da ki iing dewbilat bad ki kper ki phrah ruh, kim don dieng don siej, kumta ki khun, ki la ioh mon shibun, namar ba ki kmie, kim don dieng shuh ban sympat lane ban ai jingsneng ia la ki khun bad mynta, ngi iohi, ba ki kmie ki kpa, ki khroh ki kjor haduh katta katta, ia la ki khun, ha kaba kim lah shah, ban don ba mai ba tim, ne kiba wohnia wohdaw ia ki khun.
Ha kaba kum kane ka por, jong ka jingkylla jong ka juk, ka long kaba donkam ban pynkynmaw, ia kito ki jinglong jingim khynnah jong ki 30.40 snem mynshwa, ha kaba u dieng sympat, u dei u nonghikai uba pynbeit ia ka jinglong runar ki khynnah.