U Conrad Sangma, u MR, uba bunkam bha

U Conrad Sangma, myntri rangbah ka jylla, u dei u briew, uba bunkam bha bad ngim tip, la ka jingsynshar ia ka jylla, kaba don tang kumba 30 lak ngut ki nongshong shnong, ka donkam ne em, ban bunkam haduh katne.

Kito kiba bud ia u myntri rangbah, ha ka twitter, ki iohi bha, ba ha ka shisngi, u ju pyndep, da ki phew tylli ki jingialang bad kata ruh, tang kiba u pyni paidbah ha katei ka peij jongu bad ki don ruh ki khep, ha kaba ha ka shisngi, u ju leit bad wan phai noh na Delhi.

Kat haduh mynta, ym pat ju don ba wad jingtip, lyngba ka RTI, ia ka jinglut jingsep, ha ka iaid ka ieng jong u myntri rangbah, namar ba katei ka jinglut, ka dei na ka pisa jong u paidbah, kaba u da sei ia la ka umsyep, ban siew thikna, ia kawei pa kawei ka khajna (kynthup naduh ka jingpruid kaba rit tam, haduh ha u khaw, bai petrol, bai kali), kaba la teh da ki kyndon kiba skhem, da ka sorkar Jylla/sorkar India.

Hynrei hangne, ka wan ruh ka jingkylli, la ka donkam ne em, ia u myntri rangbah, ba un leit shang shnong haduh katne katne bad la ju kynmaw ia U PA Sangma (u kpa jongu), ba u ong ba ka Meghalaya, kan long aiu, namar ba ka dei tang ka jingheh jong kawei ka District ha Madhya Pradesh. Kam dei tang katta, U Bah BB Lyngdoh, uwei na ki nongialam barim, u ju khie bitar, haba ki ju khot ia u, ban leit plie ia ki CHC, PHC bad leit buh maw nongrim ia ki surok; katba mynta pat, la iohi, ba ia ki khun sniang, hap leit sam hi da u myntri rangbah bad ba u da rah ruh, ia ka ruh ba don ki sniang.

Ki myntri rangbah, kiba mynshwa, kim ju kham leit Delhi bad haba kynmaw, kaba ki leit Delhi, ka dei, haba don ka jing ialang jong ka Planning Commission bad ha katei ka por, ki ia kynduh ia u myntri rangbah duh bad ki buh ia baroh ki jing donkam jong ka jylla, ha katei ka jing ialang bad kaba sah, ka dei ka kam ban buddien da ki ophisar, kiba don ha Meghalaya House New Delhi bad sa kiwei pat ki lynti.

Haba shu peit ha kine ki sngi, la iohi, kumba ka jingbunkam eh jong u myntri rangbah, ka la ktah ha ar tylli ki mat kiba donkam bha bad kawei ka dei ka jingpheil ki machine jong ka sorkar ha ka step, jong ka 22tarik Naiwieng 2022 ha Mukroh bad nangta, sa kawei pat ka dei halor ka jingleh kyrkieh ia u pud u sam, hapdeng ka Assam bad ka Meghalaya.