Ngi iohi ha kine ki sngi, ba ka umsaw ha kylleng pyrthei, ka lynshop ia ki iing ki sem, ka rong ia ki kali, ka pynjot ia ki surok bah, ka jynrat ia ki jingkieng, ka rong ia ki briew bad ka jingduh na kitei ki jingjia, ka long kaba jubor haduh katta katta bad kiba kum kine ki jingjia, kim ju kham jia satia ha ki nongkyndong, hynrei, ki jia bha, ha ki jaka sor, ha kaba don ki surok bah kiba heh, ki iing kiba remdor bad ki nongshong shnong kiba riewspah.
Tang shu la ther jur u slap, ngi iohi, ba ka nongbah Shillong, ka shlei da ka um, ka sor bah Delhi, kaba dei ka nongbah jong ka India ruh ka rong ia ki kali bad pyniap ia ki briew bad lada dei ha Mumbai, ha Wayanad bad sha ki jaka sor bapher jong ka India, ki mad ia kine ki jingjia kiba shyrkhei sat.
Lada ngi peit shwa ha Shillong, ngi iohi, ba ki wah ki la kylla madan, ki lum ki la kylla pung bad katei ka dei, na ka bynta ban tei ia ki iing shong briew, ban tei ia ki dukan bad ki iingbah bad ka daw, ka long namar ba ka jaka ka la kyrduh ha sor bad ha khap sor bad tang ki klur pati lane ki dap million, ki ioh shong iing ha sor, katba kiba kham duna ka pla, ki hap ban kynriah ialade sha ki riat ki ram, sha ki rud wah bad kiba kham bun, ki leit sha ki rud sor.
Kin don kiba peit kai bad pyrkhat halade ia ki iing kiba tei harud ka wah Umkhrah bad kiba ieng ha tmier jong ka riat bad ngim tip, la kitei ki dei kiba la ai jingbit da ka Municipal ne kiba la mynjur da ki trai jaka bad ki bor shnong bad nangta, ia ki iing bad ki jingtei kiba don harud ka wah Umshyrpi lane wat harud ka wah Umiam kiba lah ban pyn itynnad ia kiba peit na rud ne pyn pyngngad ia kiba shong, khamtam ha ka por shit, hynrei kitei ki jingtei, kin long ka jingma ia ki trai iing, khamtam ha ka por slap.
Ka la donkam ia ka ain kaba eh bha, na ka tnat Municipal, lane na ka tnat khlaw bad kiwei, ba ka dei ban khang shisyndon, ia ka ka jingleh thombor ia ka mariang, da kaba khang lynti ia ki wah, da kaba pynkhyllem ia ki lum bad ban pyn madan ia ki pung, namar ba kitei ki dei ki jingdon jong ka mariang bad kiba ka jingstad jong u bynriew, kim lah ban shu pynduh pynjot.
Ki don shibun ki jingiakren, ba ki jingtrei kiba la trei da u phareng, ha ki spah snem mynshwa, ki dang ieng kynjreng haduh ha kine ki sngi; hynrei haba shu peit nuksa la iohi, ba u phareng, haba u trei surok, um ju ialeh pyrshah ia ka lynti iaid jong ka um bad dei na kata ka daw, ba ki surok ha ri Khasi, ki ju long kiba lam khongdong bad kim ju shlei um ruh, namar ba ki kali ruh ki dei ban iaid bad ka um ruh, kan iaid la ka jong ka lynti, hynrei ha kine ki sngi, ha ka jingwan lei kine ki kompeni heh, la iohi, ba la shu pyntwa naphang lin bad dei na kata ka daw, ba ha ka por rang ki nion ki puh shilum ia ki lum ki them, katba mar ia wan sa u lap, ka wan sa ka jingshlei um, kaba pynjot thiaw ia ki iing ki sem, ia ki surok bad kaba pyniap ruh ia ki briew.
Kine ki jingjia, kim da ktah than ia uba iohi na rud, hynrei kito kiba mad dalade ki sngewthuh ia ka jingkthang mynsiem ka bym don nia shuh ban batai bad ka donkam namarkata, ba haba ngi wad ia ka roi ka par, ba ngin peit ruh ba kan nym pynjulor kput ia ka mariang lane ia ki wah ki um, kiba la iaid ha la ka lynti da ki bun pateng bynriew.
Phi don ban ong eiei?