U bah Prestone, u kyrtong MR ka NPP

Ka lyer elekshon, ka la sdang beh stet pynban ha kine ki sngi bad ka daw, ka long hadien ba ka seng Congress, ka la jied ia u nongialam uba khlain bor bha, uba dei ruh U MP jong ka Shillong Lok Sabbha Constituency.

Mar ia wan U Ma Pala, ki la mih shibun ki jing iakren, halor ki jing bym larkam jong ka sorkar MDA, ba la khlieh da ka NPP bad kawei na kitei ki mat, ka dei halor ka jing bym bat kular katei ka seng, ban jied ia U bah Prestone, kum u myntri rangbah ka jylla, kaba ki la pyrta kylleng kylleng, ha shwa ka elekshon MLA 2018.

Katei ka dei ka mat, kaba (imat) ka seng Congress, ka la pynkhreh ban sangah tyngeh ia ka seng NPP, halor ka jing bym bat jong katei ka seng, ia la ka jong ka kular bad nangta ban pyni ruh, ba katei ka seng, kam khein snep satia, ia utei u rangbah, uba ki la shim, ba u dei u nongialam na Ri Khasi Jaintia.

Ngin dang ia peit, ia kaei ka ishu, ka ban mih, halor katei ka phang, hynrei ka jing shisha, ka long hi, ba katei ka dei ka mat jing iakren, kaba shai bha ha shwa ka elekshon MLA 2018 bad kam dei tang kata, hynrei, ka dei ruh ka mat kaba don jing shisha, namar ba U Bah Prestone, u dei U MLA bad ki MLA, ki dei ban jied para ma ki, ia u nongialam thymmai, hynrei katei ka leit kylla da kumwei, ha kaba ynda la kut ka elekshon, u shu shim suk pynban, da U MP (U Conrad ha katei ka por) ban ialam ia ka sorkar.

Ngin sa ia sngap, ia ka jubab jong U Conrad bad U bah Tynsong, ia kaei kaba kin pynshai sha u paidbah, ha ki sngi, ki ban sa wan (khamtam hadien ba U Dr Donkupar Roy, uba la shim, ba u dei uba kren pyrshah ia U bah Prestone, um don shuh ha kine ki sngi), hynrei na kaei kaba paw hangne, ka kdew shai, ba ka seng Congress, kan thaw ia katei ka mat, kum ka ishu elekshon, kaba khluit bha ha kine ki sngi.

Kam kut tang katta, ka don sa kawei ka bynta, kaba U Himanta Sarma, uba dei u heh duh ka NEDA, ula ju kam trai bad kata ka long ba ka ishu myntri rangbah, ka dei kaba la dep plan lypa, da ma u bad U Conrad Sangma, la lai bnai shwa ka elekshon MLA 2018 bad kumta, ka jingjied ia utei u nongialam thymmai bad ka jingthaw ruh ia ka sorkar NPP, ka shimpor tang shiphew minit, kumba la kam da u heh ka NEDA.