U Bah Prestone pyrshah U Mukul Sangma

U bah Prestone Tynsong, ula ia thalain nia hi tar ha kine ki sngi, pyrshah ia U Mukul Sangma bad ka daw, ka long halor ki jing kynnoh bamsap jong ki Sangma shi para, ia kane ka sorkar MDA, ha kaba ki la kdew kti ruh ia U Bah Tynsong, halor ka jingtih maw sha ki rud surok jong ka surok bah National Highway, Shillong Dawki bad nangta sa jing khaii masi tuh, na kane ka thain sha Bangladesh.

Halor kane ka mat, hap shu kren noh ia iwei i kyntien, ba ki shait ong “husiar la u thylliej”; tangba hane pat ruh, ka wan sa kawei ka mat bad kata, ka long, ba haba iakren kiba heh ba hain, ka shu long noh tang ka jing ia kawang ktieh bang ja; hynrei, ban da dei, ba u kynnoh u rit u ria, kata, ki la mih shibun ki sekshon ka IPC, lane ka CRPC bad kat ban da ia sngewthuh, uba shah kren, ula poi shong phatok shi hat ar hat.

Niuma, na kano ka daw, ba U bah Tynsong, u khot sngew ieid ne sngew bitar ia U Mukul Sangma, ban ialeh elekshon na Pynursla bad ngim tip, la kata ka iaid kam ne em ha ka jing shisha; bad ngim tip, ba lada jia ba U Mukul Sangma pat, u khot ia U Bah Tynsong, ban ia khun na Songsak lane na Ampati lane na kiwei ki Constituency jong ka tnga, ne jong u para jongu, la U bah Tynsong, u nud ne em ban kohnguh; namar ba U Conrad Sangma ruh, tharai, un hap pyrkhat bha, da ki hajar hajar sien.

Ka jing shisha, ka long ba ha kajuh ka sem, ym ju long ban set ia ar tylli ki masi kyrtong bad kumta, U Bah Tynsong, haba um sngew iahap ia ki rukom pyniaid jong U Mukul Sangma, ula mih noh na ka seng Congress ha u snem 2017 bad khlem pep, ka la dei ka jingduh kaba khraw ia katei ka seng, namar ka kynhun U bah Tynsong, ka ialam ruh bad kumba 7,8 ngut ki MLA ha kato ka por.

Jin da la don ka jing ia tip lem bad jynsur mynsiem jong U Mukul Sangma, khlem pep, kitei ki 7,8 ngut, kin nym poi satia sha kata ka seng trai ri (kumba ki ia ong), ka National Peoples’ Party (NPP) bad lada ka NPP, kan nym tyrwa shuki myntri rangbah ia U bah Tynsong, ha katei ka por, hangta ruh, lehse, kan dang long kaba eh, ban tan ia kitei ki masi kyrtong kiba la nep reng bha.

Ngin nym ia thab kti ia kitei ki kyntien kawang ktieh jong kitei ki nongialam; hynrei, ha ka synshar paidbah, ka donkam ka liang pyrshah kaba khlain ban woh kjat ia ka sorkar bad ngi donkam ia kitei ki arngut ki nongialam, ba kin ia shut reng bha nangne shakhmat.