Tuklar sa ka Supreme Court ia u pud ka Assam Meghalaya

Ka ishu kam pud hapdeng ka Assam bad ka Meghalaya, ka la poi mynta sa sha kti jong ka Supreme Court bad katei ka kam, ka la shu jyrwit kai, tang na ka jing bym ia sngewthuh jingmut hapdeng ka sorkar jylla bad ki trai jaka puta lane ki khlieh nongsyn shar hima lane lah ban ong, ha kawei ka kyntien, ba U Conrad Sangma, ula pyndem niuhmat eh ialade, ban pynhun ia U Himanta Sarma, katba U Amit Shah na Delhi, um pat pushe eiei ruh em, ia katei ka kam.

La hap ban kren kumtei, namar ba ka soskular, ka la don mynta la jan shisnem sha Delhi, hynrei ka sorkar India, kam shym la khih jingmut eiei ruh em, ban ioh ia ka jingmynjur jong ka Parliament bad ka dei na katei ka daw, ba soskular, ka shu bam pum pum eiei ha ki almari ka tnat poh iing.

Jin lada ka sorkar U Conrad Sangma, ka la leh kham adkar khyndiat, ia katei kam; katei ka jingeh, kan nym mih satia, namar ba ki trai jaka, lane ki 4ngut ki Syiem, kiba ai mukotduma ha Meghalaya High Court, kin nym poi satia, sha katei ka jing ia pyni bor bad ka sorkar bad kan nym don ruh kumta ka jing ia tyngkhuh ha kashari.

Mynta, haba ka jingialeh ka la poi sha Supreme Court; kumta ka jingeh, ka la ktah ia ki trai jaka bad ki khlieh nongsynshar, ba ki hap bei ia ka jinglut kaba bun, ban iakhun ia ka mukotduma, katba ka sorkar jylla, kaba wad burom politiks ialade, kam don jingduh, wat tang shi damli ruh, namar ba ka jinglut jingsep, ka dei na ka jingsiew khajna jong u paidbah.

Kaba sngewjli sohsat, ka long ba kat ha Supreme Court, ka sorkar jylla, ka nud ban leit kam, ba ka kam pynbeit pud, ka dei ka kamram jong ka sorkar bad haba ka long kumta, ka pyni shai, ba ka sorkar Meghalaya, ka la knieh ia ka jinglong trai ia ka khyndew ka shyiap jong ki Khasi, lane da kaba pynhap ia ka kyrdan bat khyndew, kum ka khyndew sorkar, kaba ki ju leh ha Assam.
Wei haba la poi ha katei ka kashari ba heh duh, kumta ka la dei ruh ka por ban ia pynhiar mynsiem jah thait, da baroh ki liang; hynrei ba kin pynkhreh ia la ki jong ki jingshisha, namar ba ngi tip shai ba ka Ri Khasi Jaintia, ka hap ha ka Sixth Schedule lane kaba ki ong ka tribal land bad kam dei ba ka sorkar kan nion jubor.