Thylli ka shuki IAS, ia ki samla Khasi

Mynta la kumba shiphew snem eiei, ka jaitbynriew Khasi Jaintia, ka shu shong thylli, ha ka bhah jong ki ophisar IAS lane ha ka eksamin, jong ka Union Public Services Commission (UPSC).

Ka long shisha, ka jing lehrain, kaba khraw tam ba ngi hap ban pyndem ia la u jong u niuhmat ha kiwei pat ki jaitbynriew, lada dei ha ka eksamin UPSC, lane lada dei ha ki eksamin SSLC, HSSLC ruh. Ha iew ha hat, ha ki surok bah ne ki surok rit, ka mynsiem kob sarong bad ka hanga mei, ka la synshar jur ia kiba bun ki samla ka Ri, ha kaba ki kwah ban pyni, ba dei tang ma ki, kiba ieid ri bad ieid jaitbynriew bad kitei ki iaid lymbung ban pyni ha khmat u paidlang ka Ri, ba ki iam pait dohnud dohnam halor ki jingeh, kiba ka jaitbynriew ka iakynduh.

Ym tang katta, ki riew sain pyrthei jong ka jylla (khamtam ki nongialam Khasi), ki shu lapmiet ban kren komik, man la ka sngi, ha kaba wat ia ka ishu jong ka iap ka im jong u paidlang ka Ri, ki pynkylla kam kai pynban bad katei ka pyni, ba kim sngewthuh ban kyllan dawai, ia ka jaka jong ka jingpang, hynrei, ki kyrshut ban nang pynheh, ia ka jingmong. Ka long kaba isangsot shibun ia ki samla jongngi, kiba don ka jabieng kaba proh; namar ba ki la shah pynjot thiaw ia ka lawei jongki, lyngba ka thymmei jong ka jinghikai kaba tlot, naduh ba ki sdang ban pule ia u abkd bad haduh ha ki kolej bad ki University jongki bad ia katei ngi iohi, ba wat ki nonghikai, kim hun bad kim bang ia kane ka kam, namar ba ka dei ka bym thikna satia.

Ngim tip, ia kaei, kaba ngin leh, nangne shakhmat; hynrei, ka don tang kawei ka lynti, kaba kongsan bha bad kata ka long, ba ka sorkar jylla, kan sangeh noh, na kaba pynlong tuta bad moina ia ki samla jongngi, da kaba shu pule lyndet ia ki lynnong kot jongki bad ka la dei mynta hi ban rai noh, na ka bynta ban jied ia ki skul, ki kolej kiba bit duh ban iakhun ia ki eksamin kiba kongsan jong ka Ri bad ka la dei ban iateh lok bad ka Pinemount skul, ka Public Scool, ka St Anthony’s, St Mary’s nalor kiwei pat, ban sei ia ki heh jabieng, ba kin iakhun ia kitei ki eksamin. Ka long kaba i syier shi katdei ia ka lashai jong ka jaitbynriew, lada ki nongthaw ain, ki la long kiba tlot bad sa ki ophisar, ki bym tip ia ka dustur riti jong ka jait bynriew Khasi khara.