Thet kti ki shnong ban iarap corona

Ki dorbar shnong ha kane ka kynti, ki la rai ban thet kti noh ialade, na ka jing iakhun ia ka khlam corona bad katei ka dei ka khubor, kaba sniew shibun na ka bynta u paidlang ka Jylla, lada ki bor shnong, kim bah khlieh shuh ban iakhun ia katei ka jingpang, kaba satar haduh katta katta.

U paidlang ka Jylla, um dei ban klet ia ka jing trei bor bah ki dorbar shnong, ha ki bnai Iaiong, Jymmang ba ladep, ha kaba ki la ri ki la kdup ia la ki jong ki khun ki kti, ki iing ki sem, ha kato ka por, ba ki dang wan na sha jngai bah, hynrei ha katei ka por ruh, ka sorkar kam don jaka shong jaka sah ban pynshong kyrpang ia ki phew hajar ngut, hynrei ki shnong, ki la trei ha la ka jong ka bor, ha kaba da ki hajar tylli ki jaka kyrpang, ki la ia peit ha ka bor jongki hi. Ka sorkar Jylla, haduh mynta, kam shym la niew burom ia ki nong pyniaid shnong bad kam don kano kano ka jing peit ba kyrpang, na bynta kitei ki riew len lade, kiba la shong ha ka miet, ka ioh ban iada na ka jing saphret katei ka jingpang khyllah.

Mynta ka khlam, ka la sdang ban pur, ym shuh na kiba wan nabar, hynrei ka la don ha la ki jong ki jong ki shnong lane kumba ong ki stad “community spread” bad haba ka jingpang, ka nang pur na kawei ka shnong sha kawei pat, ka long kaba eh ia ka sorkar, ba kan teh lakam dalade bad ka hap ban wad ia ka jing don bynta jong u paidbah; hynrei ha kata ka por, ba ka jing donkam, ka dang jur bha, ki bor shnong, ki hap ban thet kti bad ka daw, ka long ba ka jing iakhun ia katei ka khlam, ka dei da ka kti kaba suda.

Ka sorkar Jylla, ka ioh ia bun bah ka pisa iakhun corona na ka sorkar India, hynrei katei ka iaid ban pynheh pynhain ia ki hospital, ia ki CHC, ki PHC bad nangta ban pyniaid ia ka iaid ka ieng bad ka leit ka wan ki babu ki sahep sorkar, katba ka jing pynshlur ia ki shnong ki thaw, ia ki paidbah kam don satia bad kumta, lada ka jing iakhun, ka long da ka mon lajong, kam donkam satia ban ia don bynta bad kiwei.

Ki dorbar shnong, ki la lut la jhor ha kane ka jing iakhun corona bad ka bill jongki, ka iaid sha ka pla jong u paidbah, katba ka bill jong ki hotel, ki restaurant, ki dukan die tiar, ki dukan die petrol, ka iaid beit beit na ka pla jong ka sorkar bad katei ka pyn ngiah noh ia ki shnong ban iakhun corona.