Tang lah shongthait kam ophis, sa ka kwah ialeh elekshon?

Namar ba ka elekshon, ka la hajan eh, la iohi mynta, ba ki la sdang mih ki nong Samaria babha bad kitei ki kner ia la ki kti sha ki duk ki rangli, da ki jingai bapher.

Ym tang katta, la iohi shuh shuh ia ki myntri sorkar, ki MLA, MDC ba ki pynlut, ia la ka jong ka por, da kaba ki leit pynbna ia ki skhim bapher jongki, ban ai sha u paidlang ka Constituency; hynrei ha kaba kum katei ka por, kaba lyngngoh ka long, ba ki don ruh bun bah ki nongthab kti, haba leit ot ribon lane leit buh maw nongrim, ia kum kito ki skhim bad ngim tip, la kitei kiba leit ia lut sngi lut ia, ki ia ioh bai thap kti ne ioh ki ia hun, tang da ka dih sha saw.

Nai iakren shuh ia kata, hynrei, kaba pyn ijli noh, ha ki por elekshon, ba ki don bun bah, sa kiba la jan shongthait na ki kam ophis jongki, ba ki mih ban khroh ban kjor ia ki nongthep vote bad katei ka dei sa kawei ka mat, kaba da i shutia tasam bad haba peit ia katei ka jingleh, la iohi pynban, kumba ki don bun, kiba pyn ia syriem ia ka kam shakri paidbah, kum ka kam shakri Blei, ha kaba ki tymmen, kiba la shongthait, ki shait sngew ieid ban shong sha ki ben kiba shakhmat ha ki iingmane lane ha ki jingiaseng jong ki kynhun niam bapher.

Ka sorkar lane ka elekshon komishon, kam lah satia ban khang ia kitei ki jait briew, kiba shu rhah lut halade; hynrei, ka la dei ia u paidlang ka jylla, ba un nym ailad ia kitei ki rhah bor, ba nalor ba ki la ioh bam hun ia ka tulop sorkar bad nangta sa ka bai bam tymmen; mynta, kim pat ki dang thap sa ia ka tulop MLA bad katei ka jingmut ka dei ban duh shisyndon.
Kam dei tang kata, hynrei, ka kam shakri paidbah, ka dei ruh ban don ia ka jingshemphang, ban trei ia ka kam bad ka dei ia kito kiba dang khie dang san, ba kin wan sha kane ka lain bad kam dei ia kito kiba la mlien, ha ka ban shah hukum ha kiwei.

Ngi don shibun ki samla ba dang khie dang san, kiba shu shong khlem kam, ki nong shakri paidbah, ki riew shemphang ha ka imlang sahlang bad kitei ki dei ban ioh ia ka lad ban kit ia ka lyngkor kum ki nongmihkhmat paidbah bad kim dei satia ia kitei kiba leh myn leh ieid briew, ynda, haba ki la kut ka por trei kam sorkar jongki.