Ki jing iakhih, ki la nang iaid ha kine ki sngi, halor u pud u sam, ka jing dawa weng kam pulit, ka ILP bad kiwei bad lada phi leit ha kino kino ki jing ialang paidbah, la ioh sngew ba ki sengbhalang, ki nongialam bapher, ki ther beit ia ki nong mihkhmat paidbah bad kiba kham shah ther jur, dei u myntri rangbah, u symbud myntri rangbah, u myntri kam poh iing.
Ka Baibl, ka ong “Burom ia ki nongsynshar, namar ba ki dei kiba la ai bor da U Blei”, hynrei, haba peit ha kine ki sngi, katei ka jingmut, kam don shuh, namar ba ha man la ki jing iakren paidbah, kitei ki nong ialam, ki nong synshar, ki la kylla long kum ka sohpdung, ha kaba la shu siat naphang na ka diang, na ka mon bad haba sngap ia ki jingkren, la sngew, kumba kitei ki dei kiba shu jop elekshon khlem ialeh, lane khlem don ka jing kyrshan nangno re nangno lane kiba la thikna ruh ba kin nym jop shuh, ha ka sien, ka ban wan.
U Mukul Sangma, nongialam liang pyrshah, ha ka jingkren jongu, ha ka dorbar jylla, ha ki khyndiat sngi ba ladep, u la pyn kynmaw ia ka jingsiat briew ki pulit, halor ka ishu MBOSE, ha u snem 2005, ha kaba ula ong ba ula hiar shuki noh, kum u myntri kam poh iing ha katei ka por bad u bteng biang “hynrei ngam shym la shah kyntait satia, na ka jing shakri ia ka kam paidbah” bad kaba thew, ha kawei ka kyntien “ia u phi lah ban bein, hynrei kumno phin rat”.
Haba don kum kine ki jing iakren, ka la dei ruh ban pyrkhat, ba lada phi bein ia u myntri rangbah, hato phi lah ne em ban bujli da uwei pat, lane lada phi kham sngew bitar, phi lah ne em, ban pynrem noh ia u, ha ka elekshon, ka ban sa wan; lane lada iakren ha kawei pat ka kyntien, ka long ba kito kiba pyrshah, ki lah ban kham jur ka jing sawa, katba katei ka sur, kam iaid kam satia, ha ka tynrai jong u paidbah.
Nangta la iohi shuh shuh, ba ki seng bapher, haba ki iaid, ki ju kham iajan bad ki liang pyrshah, wat la ki tip shai, ba kim lah satia ban leh eiei ruh bad katei ka dei sa kawei ka jingmut kaba la shu leh shongshit bad shah pynshad shrieh, ha ki riew sain pyrthei.
Ka jingim, ka don bun jait ki jing ialeh bad ha ka jing ialeh, ka don ka jop bad ka rem, hynrei ban ialeh shongshit than, ki shu pynblad mluh noh ia ka jyntah.
Kata ka dei ka jingshisha ba bunsien la shu kren bein beit ia ki nongmihkhmat ba ma ngi hi ngi jied khlem da burom shuh ia ki. Kane ka jinglong kam itynnad satia kum ka jaidbynriew tip briew tip blei.