Tang ki ishu niam, manla ka sngi

Ka sain pyrthei jong ka India, ka iaid ha ka jing jyrwit suda, man la ka sngi bad katei kam dei, na ka daw jong ka jinghiar dor ka pisa India, ha ka dollar, lane ka jing kiewdor ki mar ki mata, ha kaba ka inflation, ka poi sha ka 7.79 percent; hynrei ka ishu, kaba ki ia bang bha, ha kine ki sngi, ka dei halor ki ishu niam.

Khyndiat sngi mynshwa, la iohi, ia uwei u heh BJP, ba u leit sha High Court, na ka bynta ban kam trai ia ka Taj Mahal, kaba la tei ha ki snem 1630, lane ka jingtei kaba la jan don 400snem mynta bad ka daw ka long, ba u kam, ba ha khrum jong ka Taj Mahal, ki don ki dur blei Hindu.

Kam dei tang kata, hynrei ki kotkhubor, ki dap man ka sngi, da kitei ki jait khubor niam suda, kiba kynthup ia ka jing pynduh noh ia ki tynghung, na ki iingmane, khamtam ki iingmane Muslim, nangta shwa kata, ka la sa mih sa ka jing ujor ia ka riam jong ki khynnah skul Muslim, ba ki tap ia ka khlieh lajong bad nangta ba la weng sa ia ki kot pule, kiba dei bad ki jingjia ha ki por jong ki nong synshar Muslim, ha ki spah snem mynshwa bad ba la pynrung da ki kot jinghikai ia ka niam hindu bad kumta ter ter.
Kumba la ong haneng, ka India, ka don mynta ha ka jingeh kaba khraw, na ka jingkiew dor ki mar ki mata, ha kaba ka pisa India, kam iaid iew shuh ha ka dor jong ki pisa ka pyrthei, ba kynthup ia ka dollar, kaba dei ka pisa jong ka pyrthei bad katei ka ktah shibun ha ka iadie iathied bad ka ia khaii pateng hapdeng ka India bad ki ri ka pyrthei.

Ym tang katta, sa ka jing kiew dor tasam ki mar ki mata, ka la jubor haduh katta katta, ha kaba ka dor jong ki marbam, ka la nang kiew stet shajrong bad katei, ka la ktah shi katdei ia u luk u lak, uba kamai mynstep bad bam mynmiet.
Ka kam niam, ha ka jing shisha, ka dei ka kam, kaba ngi dei ban sngewthuh ia ka jing sngew iahap jongngi shimet bad ka dei ka jingiadei jongngi bad U Blei bad halor katei ka mat, ngi la don ia ka artikel 25 jong ka riti synshar Ri bad kam dei tang kata, kawei pa kawei ka niam, ka la don ia ki nongialam jongka bad kitei ki dei ban peit ia ki rukom treikam jongka bad kam dei satia, ka kam jong ki riew sain pyrthei, ba kin ieng ha ki rynsan paidbah, ba kin sei la ka jingthiang thylliej bad leh ialade kum ki messiah ieid niam.