Tang ban leit rah bowl sha Delhi, kumno ia kiwei pat ki hok ki rit paid?

Ha ki khyndiat sngi ba ladep, ka la don ka jingtwa kaba jur, na ka daw jong ka jingther u lapbah, ha ki bynta ka jylla, khamtam sha Garo Hills bad u myntri rangbah, ula leit her bran sha Delhi bad dawa pisa T.300klur, ban tei thymmai ia ki jingjulor ba har rukom, kiba la ktah, na ka daw jong ka jingshlei um.

Hynrei, ynda haba la khein la diah, la iohi, ba katei ka jingpan pisa, kam iahap satia tang shi saphit, na ka jing julor ba shisha, namar ba ka jingkhein kaba thikna, ka poi sha ka T.26hajar klur.
Katei ka jingher kyrkieh sha Delhi, ka pyni, ba ka wan rah ia ka jingbakla, ha ka khein ka diah bad kaba long pynban, ka jing duhnong ia ki lad jingiarap sha u paidlang ka jylla.

Katei kam dei eh, ka mat, kaba ngin iakren; hynrei, ka jingshisha hangne, ka long, ba ki nongialam jong kane ka sorkar MDA, haba shu peit, la iohi, kumba ki long tang ki nongrah dak hapdeng ka Delhi bad ka Shillong bad kata ruh, ka long tang ia ka money order, lane tang ia ka lain kaba dei bad ka pisa pilain.
Kane ka jingleh, ka kdew shai, ba ia man i kam, iba shi tyngka haduh iba shi klur, la hap ban shu shaniah lut na Delhi bad kane ka pyni shai ba kane pleng ka jylla, kam don pisa eiei satia nalade.

Ha kine ki san snem duna, kane ka sorkar U Conrad Sangma, ka lah ban kam, ba ka la wan rah ia ka roi ka par, ha ki bun ki liang; hynrei ha kaba kum kane ka por shim result, ka dei ruh ia u paidlang ka jylla, ba un kylli, ia kaei kaba kane ka parti, ka la leh, halor ki jingkular elekshon jongka, ha u snem 2018?
Ban jer kyrteng ia u dewiong, uba ki kular hapoh 8bnai, ban jer kyrteng ia ka them metor, ban jer kyrteng ia u pud u sam, ka jingiarap ia ka rep ka riang; nangta ia ki ain iada ia ka jaitbynriew, lada dei ia ka ILP, MRSSA; hynrei ki jingshisha, ki paw shai, ba ym don, wat tang kawei na ki mat jingkular jongki, kiba la larkam haduh mynta.
Kawei ka mat, kaba kongsan, ka long ruh halor ka bor jong ki nongialam ka sorkar Jylla bad kata ka long, la ka dei ka kamram jongki, tang ban rah bowl sha Delhi, ne ioh lehse, ki dei ban dawa ia ka hok bad ka bhah, kaba ka jylla, ka dei ban ioh na Delhi?