T.50 hajar, sha kiba iap khlam covid

Ka sorkar jylla, ka la sdang ban leh eiei, ha kane ka snem covid kaba ar bad kata ka long, ba ka la pynbna, ban siew T.50 hajar sha kito kiba iap na ka khlam covid bad nangta ban siew bai sumar, kaba long hapoh T.60hajar sha kito kiba leit shah sumar ha ki hospital, na ka bynta shi taiew eiei.

Ban shu ia woh kjat, ka daw, ka don beit, hynrei ha kajuh ka por, ngi hap ban pdiang, ba ka sorkar, ka la sdang ban leh eiei, da kaba kan siew ia katei ka T.50hajar sha kito ki longiing, kiba don kumba 350ngut bad kiba iap, hadien ka 1tarik Iaiong 2021 bad nangta sa ka bai sumar, kaba T.60hajar.
Katei ka dei ka jing iarap, kaba rit duh, ha kum kine ki sngi, ha kaba ka bai shah sumar ha ki hospital praibed, ka ju shongdor palat lak tyngka, na ka bynta shi taiew eiei; hynrei ka wan pat ka phang, ba lada ka sorkar, ka la siew sha kiba iap, ka hap ban pyrkhat, pat ia ki khun jong kiba iap (lada ki don), khamtam lada kiba iap, ki dei ki nong kamai ha iing bad kam dei tang katta, ka la dei ruh ban kham pynleit jingmut ia kiba shong kyrpang, ha la iing, ba kan iarap, ka dawai dashin, ka bam ka dih, namar ba kane ka jingpang, ka la pyn ia khlad noh, ia u lok bad ka lok, ia u lok bad ki khun bad ki don ruh, kiba ia ioh ia ka jingpang, baroh shi iing shi sem.

Ka sorkar jylla, ka la leh kiar bha ia kane ka kam iarap, ia kiba pang corona, ha kine ki taiew ba ladep, ha ka por, ba ka dang kiew stet, ha kaba ka la mih ruh ka jingkren, na ka shyntur jong u symbud myntri rangbah, ha kaba ula kren shai, ba ka sorkar kam lah ban iarap satia ki paidbah bad kaba dei ka jingkren, kaba pynsniew mynsiem ia kiba bun; hynrei katei ruh, ka long ka jing shisha, namar ka jylla kaba duk, kum ka Meghalaya, ka hap ban shaniah, naduh i bai sanitizer haduh i bai mask, ha ka jingbei pisa kylluid ka sorkar India.

Kam dei tang katta, hynrei, ha kane ka kynti, ka sorkar jylla, kam shym la pan jingiarap pisa shuh ruh na ki paidbah, ha ka kyrteng ka chief minister’s relief fund bad lada yn jin da la pan jingiarap, kumta, kan jin da la mih da ki klur tyngka bad katei kan leit sha ka jing sumar ia kiba pang khlam.
Ka jing ia wohkjat, kan nym da don jingmut than, hynrei, kaba donkam, ka long tang ba ka sorkar, kan peit lem ia kitei ki shem lanot bad ba kan siew noh stet, da kaba leit pynpoi ia ki pisa ha ki jaka thiah jongki ba pang corona bad ba kan nym pyn lait met ialade, da kaba ai daw sha ki Bank bad ki Bank Account, kumba ki la kynnoh ia ka jing sahkut, ka bai iarap ia ki nong bylla sngi.