T.158klur, bam tuh ki nongtrei ka tnat rel

Ka la dei ka jingjia kaba sngew kyndit shi katdei, ba ki nongtrei ka tnat rel jong ka North East Frontier Railway, kin bam tuh haduh T.158klur ka pisa bad kata ruh, ka long da kaba sam ia ki jing pynbna jong katei ka tnat sha ki kotkhubor, ki bym ju pynmih iew satia bad katei ka dei ka jingjia kaba triem haduh katta katta bad ka bym kit tang ia katei ka pisa, kaba la kdew haneng, hynrei, kan lah ban poi sha ki phew hajar klur, kiba kynthup ia ka jing ia bam tuh ha ki kam ki jam jong katei ka tnat, kiba lah ban shongdor da ki phew phew hajar klur.
Lyngba kane ka jinglap jong ka CBI, ka la dei ka por, ia ka tnat rel ba kan peit biang sa shisien, ia ka rukom sam jingpynbna jong katei ka tnat sha ki kotkhubor, namar la ju iohi shai, ba ki kotkhubor na Meghalaya, kim ju ioh bhah eiei ruh em, na katei ka tnat bad katei ka pyni, ba kiba ioh ban nion ia ki jing pynbna, ki dei ki kotkhubor na Assam suda, kiba lah ban leit malish ia ki briew jong ka tnat rel.
Ka la dei hi ruh ia ka tnat rep, kaba dei ka tnat kaba heh tam jong ka sorkar India, ba kan don la ka jong ka lain, ka ban ia syriem ia ka jingtrei kam jong ka davp jong ka sorkar India bad ba ia baroh ki jing pynbna jong ka north eastern frontier railway, ba dei ban ai bhah ia baroh ki kotkhubor kiba don sha ka thain shatei lam mihngi bad ba kim dei satia ban shim kabu, tang ki kotkhubor kiba na Assam.
Lada ka tnat rel, ka lah ban lap ia ka bam sap kaba T.158klur, ha ka jingsam ia ki jingpynbna sha ki kotkhubor ki bym don satia ha iew, ka la dei ka por ia ka sorkar India, lyngba ka tnat davp, ba kan peit bha sa shisien, ba kan pyrkhat khia mynsiem bad kata ka long ba kan iarap ia ki kotkhubor kiba tlot bad kiba rit bad kiba thikna ban mih ha iew, hynrei kaba ka long, ioh lehse, ka iaid lem da katei ka buit jong ka tnat rel, ba kan bsa ia ki kotkhubor, kiba shu paw kyrteng tang ha katei ka tnat sorkar.
Ka la dei ruh ka por ia ka sorkar Jylla, ba kan shim khia ia katei ka bynta bad kata ka long, ba kan iakren bad ka tnat rel lane bad ka sorkar India, ba ki kot khubor kiba don ha Shillong, ha Tura bad ha Jowai, ba kin nym shah leh shiliang satia, hynrei ba kin ioh ia kajuh ka jing ithuh, kumba long ki kotkhubor ha Delhi, Mumbai bad ha kiwei de ki Jylla ba bun paid ka India.