Sngang sa ka lockdown

Ka sorkar jylla, ka la pyn jari, da ka pakhang shnong, ha kine ki sngi, ha East Khasi Hills bad katei ka la bteng mynta, la jan shi taiew.

Kham mynshwa, ka sorkar jylla, ka ju kren kiar bha, ia ka lock down, hynrei, ka pyrshang ban pyn donkam da kata ka kyntien containment measures bad haba khein lang ia kitei baroh ar, ngi la mad ia ka jingshah khang lane ha ki kyndon kiba pyrkhing, mynta la jan dap ar taiew bad ha kine ki ar taiew duna, ka la long ka jingim kaba kordit sat ia u luk u lak, uba bylla sngi, uba trei kam lajong, uba die dukan, uba kamai kali bad ter ter.

Haduh mynta ka sorkar India, kam treh shuh ban pyn donkam ia ka jing ia tied pliang, tied shamoit, ka jing ia khot pakhang shnong bad ka la ngiat sha ki sorkar jylla bad katei ka long,ba ka sorkar India, ka sngewthuh bha, ba ka la pheil, ha kaba pyniaid ia ka jing maham covid kaba nyngkong bad nangta, ba kam kwah shuh ban pynlut pisa, na ka bynta ban map ia ki ram ki shah bad ki jinglut jingsep jong u paidlang ka India, ha ki sngi jong ka jingkhot pakhang shnong.

Ka sorkar Meghalaya, ka la shu nion jem, na bynta kine ki ar taiew jong ka jingkhot pakhang shnong bad kam shym la tyrwa jing iarap satia ia u paidlang ka jylla, wat tang shi naia saw ruh bad ha kane ka kynti, kam don ka jing iarap bai bylla sngi, kaba long shi spah shi sngi, kumba long ha u snem ba ladep ia ki nong bylla lane ki misteri bad ka sorkar jylla, la imat, kumba kan nym leh satia ia kane, namar ba ka pla jongka, ki la tyrkhong raw.

Hynrei, lada ka long kumta, ka pyni, ba kane ka jingkhang dam, ka thew ban pyniap ia ki 30lak ngut, ki nong Meghalaya, tang namar ki 3 hajar duna, kiba ioh ia katei ka khlam corona bad lada ka long kumta, kan dei shisha, kaba kiba bun ki ong, kam dei shuh ka iap khlam, hynrei ka dei ka iap thngan.

Ka sorkar jylla, lem bad ka sorkar India, ki dei ban tip shai, ba ka ioh ka kot jong u paidlang ha ka Ri hi baroh kawei, ka la iap mynta la ar snem duna bad ki ain kiba la pynmih na ka por sha ka por, ki la nang bam duh, ia ka kamai kajih u riew paidbah, ia ka kamai kajih, kiba trei kam lajong, ha ki lain bapher bapher; hynrei kaba i diaw mynsiem, ka long ba kat haduh mynta, la pynshlur ia u paidlang ka Ri, tang da u khaw 5 kilo bad la imat, kumba u dei u mar, uba shu leit shim na dukan bad bam im, kumba bam biskit.