U Mukul Sangma, nongialam jong ka seng TMC, ula ther tyngeh, ia ki rukom treikam jong ka sorkar jylla, ha kine ki sngi, ha kaba iadei bad ki lad ai kam ai jam ia ki samla bad halor kane, ula ai nuksa ia ki kontraktor, kiba ju trei baroh shi katta, ha ka tnat PWD, PHE, Water Resources, hynrei kaba ula ther tyngeh, ka long ba hadien u snem 2018, ia baroh ki kam, la pynlum lang ha ka song kaba heh bad hangtei ka donkam ka pisa kaba bun, ki mashin kiba heh bad kiba khlain bor bad katei ka khanglad noh ia ki samla jongngi, kiba ju trei ia kitei ki kam bad nangta, ula kynnoh ruh ba ki don shibun ki longkmie, kiba la shah pynduh kam ha kine ki sngi, ha ka sor bah Tura, kiba ju im na kitei ki jingtrei kiba rit ha ki ophis PWD. Kam dei tang kata, hynrei ka jingjia kaba da ijli sat haduh katta katta, ka long ba ia ka ophis PWD, la synshar da ki nongialam parti, ha kaba ki Engineer, ki kylla partymen bad kumta ki dei ban pynbam bang tang ia kito kiba iajan bad ki minister, katba kiwei kiba ia jngai ki shu peit jawdud ba ki ia bam heh, kito ki nongkyrshan jong ki minister.
Nangta U Sangma, ula ther tyngeh, ba ki don bun bah ki samla, kiba hap ban leit wad kam shabar na la iing bad kiba bun na kitei kim shym la wan phai shuh satia bad katei ka la pyn iakhlad hapdeng jongki bad ki kmie ki kpa, ha kaba ki khun, ki dei ban ri ban sumar ia la ki kmie ki kpa, ynda ki la tymmen.
Shuh shuh u Sangma, ula ther tyngeh, ha kaba iadei bad ka jingthung kam ia ki samla kiba la pyndep ia ki kyrdan doctorate, da kaba u ai nuksa ba khyndiat taiew mynshwa, ka la don ka jingkhot thung kam na bynta U Research Officer ha ka tnat Education, katba ka kyrdan, ki kwah ia u Ph.D, hynrei ka jingsiew pat ki tyrwa, kaba T.12hajar shibnai.
Ha kajuh ka por, ula ther shuh shuh, da kaba u ai nuksa, ba haba leit sha Secreteriat, ki la shlei mam, da ki briew kiba nabar, kiba la thung ia ki, kum ki Consultant bad ia kine ki Consultant, la thung ha baroh ki tnat sorkar bad U Sangma, ula buh da ki kyntien Consultant after Consultant ……. bad nangta, ula kylli, ba haduh katno ka pisa jong u paidbah, ka la shah knieh noh, ha kaba siew ia kine ki briew kiba nabar. Kam dei tang katta, u Sangma, ula sangah tyngeh, ba ha ka result thungkam, kaba dang shu mih dang shen ha East Garo hills, ki la don haduh 4ngut kiba ioh kam sorkar, tang na kawei ka longiing.
Ki jingkren jong utei u nongialam, ki don ia ki jingshisha kiba paw tyngkrein, namar ba ia ki skhim surok, nalor ba shu shim da ka ram, hynrei ia katei ka ram, kiba hap siew, ki dei ki nong Meghalaya, katba kiba ioh ban bam shngiam, ia katei ka pisa, na kaba pyntrei surok, ki dei ki kompeni jong ki heh spah na sha kylleng ka India bad ba ki trai shnong, kim ioh satia wat tang shi naia ban kamai ialade na katei ka ram, kaba wan da ki phew phew hajar klur tyngka.
Kine Consultant, ki dei kiba nabar suda bad la iakren teng kham mynshwa, ba ki don haduh 160ngut ki Consultant ha ka jylla, ha kaba ka jinglut na ka bynta kitei ka poi sha ka T.250klur lane kaba long T.50klur shisnem bad lehse kaba lah ban khein antad, ba ka jinglut ka poi sha ka T.20lak ha ka shibnai, na bynta kitei ki briew kiba nabar.
Kane ka sorkar, ka la pheil, ha ki kam jongka, ha kaba ka leit beh da ka ram ia man ki kam pynroi bad kam dei tang kata, ka leit siew da ki lak sha kine ki briew kiba nabar bad kumta, ka la dei ban kynjat noh ia kine ki poiei bad ka ka dei ban thung da ki samla trai shnong, ha kitei ki kam, ba kin ioh kam ioh jam, namar ba ki la don bun bah ki samla kiba la tbit ha ka rep ka riang, ha ka kam shang pyrthei, ha ka koit ka khiah, ha ka kam hikai bad bun bah ki kam ba kongsan, kiba ki trai shnong, ki sngewthuh kham bha.
Phi don ban ong eiei?