Shu thok pyllein pyllein ki heh NPP, ia u pud u sambad ki kharmetor

Ka la ijli tasam ha kine ki sngi, ban peit ia ki jingkren kotkhubor, ki heh jong kane ka sorkar synrop MDA, namar ba man ki jingkren jongki, ki dei tang ki jingkren kiba shu thok bad kiba ialam bakla ia u paidlang ka jylla.

Halor ka ishu kharmetor, ki heh jong kane ka sorkar, ki la shu thok im im peit peit ia u paidlang ka jylla, da kaba ki la kular, da ki phew phew sien, ban kynriah noh ia kitei ki kharmetor, na them Iew Mawlong bad ki la shu pynlut kai ia ka pisa u paidlang ka jylla, kaba T.2klur, na ka bynta ban siew sha ka Hima Mylliem bad da katei ka pisa, ban nang pynskhem hi trait ia ki kharmetor, kiba don ha katei ka jaka.
Mynta katei ka kam, ka la phlop bad kine ki juh ki briew, ki sait kti ialade bad ki bret ia kane ka ishu sha ki ophisar jong ka sorkar jylla bad mynta, sa ka leit khrong jaka na ka sorkar India, ban pynshong pynsah ia kitei ki kharmetor bad katei ka la dei ka kam bieit kaba la shah rkhie bein ha u paidlang ka jylla.

Wan sa u pud u sam bad la iohi, ia kane ka ishu ruh, ba katno ka jingleh shongshit jong ki nongialam jong kane ka sorkar synrop, ha kaba shiteng miet ruh, ki leit kyndar ia ki shnong ki thaw, ban iakren kam pud bad ki da kren kob sarong, ba ki la lah ban pynbeit ia u pud uba la sahteng la 50 snem, hynrei katei ruh ka la kylla noh pynban tang ka kam pynbieit paidbah, ha kaba la shu thaw ia ki komiti ki bym larkam eiei ruh em bad la shu ai ei ia ka khyndew kaba 19 square kilometre, hynrei katei ka ishu ka la shu ailad ia ka Assam, ba kan kurup jem ia kitei ki jaka, katba ia ki jaka, kiba dei ban ai sha ka Meghalaya, ka Assam, kam kwah shuh ban da ia tuklar ne ban dang ia pynbeit bad katei ka dei sa kawei pat ka kam bieit bad kaba shah rkhie bein ha u paidlang ka jylla.

Kane ka sorkar synrop MDA, kam shym la pyni satia ia kino kino ki kam, kiba dei ban iada ia ka jaitbynriew Khasi Pnar, hynrei ka shu pynbieit briew, tang da ka ktien bad nangta tang da ki skhim thohmut thohmat, kiba ki shu leit khrong na ka sorkar India bad leit shim ram na ki Bank bapher jong ka pyrthei, katba ki wan ai sha ki paidbah, da ki skhim ki bym larkam eiei satia, kumba ki la sam ia ki khun sniang bad ki khun syiar ha shwa ka elekshon 2023.