Shu pynbieit ia ki paidbah, ha man ki ilekshon

Ka jingkren U bah Prestone Tynsong, nongialam ka seng NPP, ha Mawlai, ka dei ka jingkren, kaba ki briew, ki bang bha ban ia sngap lorni, ha kine ki sngi bad ka daw ka long, ba ym pat ju don uwei ruh u riew sain pyrthei ha ka jylla, khamtam ha ka kyrdan kat u symbud myntri rangbah, ba un sei, kum kitei ki jait jingkren, ki ban ong, ba u shu pynbieit ia ki paidbah bad iai pynbieit bad nangta, ba ki paidbah ruh, ki iai ngop hi ha ka jingshah pynbiej.

Ha ka jingkren, utei u nong ialam, u ong, ba ki MLA bad ki nongialeh elekshon, ki mlien, da kaba pynbieit ia ki nongthep vote; hynrei, kat haduh mynta, ym pat don uwei ruh, uba kyrshan ia katei ka jingkren pynbieit briew, ha kaba wat, na ka seng jongu ruh, ym don satia, uba kyrshan ia katei ka nia.

Kum ki nongshong shnong, ngi hap ban sngewthuh, ba u kandidet, ha ka por, ba u ialeh ilekshon, u sei ia la ki jong ki juban lak, kiba dei halor ka bha ka miat suda jong u paidlang ka Constituency bad ka jylla bad u da bam smai ha ki riti synshar Ri, nangta, ynda ula jop ruh, u bam smai biang bad ynda u long myntri sorkar ruh, u leit bam smai biang ha iing U Lat bad kawei ka kyntien, ka ong “true faith and allegiance (ka jingshaniah bad ka jingkohnguh) ha ki riti pyniaid kam jong ka riti synshar ri bad kitei ki kyntien, hi kim ailad ban ban shu pynbieit kai ia ki paidbah lane lada kylla sha ka phareng kaba ki ong fooling people.

Ka jingkren jong utei u heh jong ka seng NPP, kam kdew shuh, tang kaba pynbieit ia ki paidbah, ha ka por elekshon; hynrei, haba la pynbieit ha ka por elekshon, kumta ha ki jing treikam jong ka sorkar ruh, lada ka dei halor ka ishu talasi dewiong, ka jingdawa ia ki hok jongngi na ka sorkar India bad wat ka jingpyn duh noh ia ka ain MRSSA, kaba la thaw da U Mukul Sangma bad baroh khoit ki jingtreikam, ki iaid beit da katei kajuh ka jabieng.
Kiba iohsngew ia katei ka jingkren, ki lah ban ia rkhie pashait ialade, hynrei ynda ki la leit phai sha iing bad kynmaw biang ia katei ka jingkren, ki hap ban sngewthuh, ba naduh ka minit, ba ki rkhie pashait, ki la shah pynbiej ialade bad kumta, haba ka elekshon, ka la hajan eh, ka la dei ia ki nongthep vote, ba kin kylla thiah kylla dem ialade, lada dei ia utei uba kren lane ia ka seng jongu hi baroh kawei, namar ba wat u myntri rangbah, um shym la pynbeit satia ia katei ka jingkren bad ka pyni ba baroh, ki don ia katei ka juh ka jingmut, kumba la phla, da utei u nongialam ba ar ka seng NPP.