Ka sorkar jylla, ka la iaid shakhmat ban khang dam, haduh shibnai shiteng ia ka nongbah Shillong bad ngi dei ban sngewthuh, ba haba khang ia ka Shillong, ka mut ba la khang ia ka Secreteriat, kaba dei ka ophis ba heh duh jong ka sorkar jylla bad haba khang ia ka nongbah Shillong, ngi tip, ba la khang ia ka jing ia kynduh ia ki MP, MLA, MDC kiba dei ki frontline warrior lane ki nong iakhun thma, kiba ha khmat duh, ban sngap, ia ki jingeh, u duk u raitoi, ha ka pang ka shitom, ka bam ka sa bad sa kiwei ki jing iarap, ba ki dei ban iarap ia ki riew kutlad.
Kam dei tang katta, hynrei, haba khang ia ka nongbah Shillong, ka mut, ba ngi khang ia ki dukan khaw, ki dukan shini, ki dukan sikret, ki dukan kyiad bad ngi khang ia ki dukan die dewbilat, ki dukan die tiar nar rod bad baroh jait ki mar ba kongsan.
Ka sorkar jylla, ka lah ban pynksan ialade, ba kam shym khang lut ia ka leit ka wan, namar ba ka plie malu mala, sha kiwei pat ki bynta jong ka jylla, hynrei, katei kan nym shongnia satia, namar ba ka Khasi, Jaintia, ka shaniah ia ka nongbah Shillong, ia baroh khoit ki jingdonkam, kum ka iew dielang.
Wat la ngim ioh ia ka dor kaba thikna, hynrei la shu antad, ba ka jing tyllun jong ka pisa, ha ka shisngi ha Shillong, kan poi sha ka T.200klur antad bad kumta, ha ka shibnai shiteng, ka jing sahkut ka pisa, kan jin da la poi sha ka T.9000klur eiei bad katei ka dei ka kti kaba pynlang da u nong kit daju, u nongdie dukan, u nongdie jhur, u nong bylla, u nongthied jingthied bad u nongdie ba har rukom.
Mynta haba kitei ki nong pynmih ia katei ka 9hajar klur, ki la shu shong, shu bam, shu thiah, kumta ka sorkar jylla, pat kam shym la pyrkhat khia eiei ruh em, na ka bynta jongki, lait noh, na kaba iarap ia kiba iap bad kiba pang, kumta ka mih hangne kein ka jing shisha, ba ki la iakren kiba bun, ba un sa bun, uba iap thngan, ym dei satia uba iap pang.
Kiwei ki sorkar jylla, haba ki khang, la iohi, ba ki pynnoh malu mala ki jing iarap, sha ki nongshong shnong, hynrei hangne ha ngi, haba don ka jingkhang dam, kaba kum katei ka jing pyrkhat, kam don satia bad ka sorkar jylla, ka don ia ka kamai jongka, na ka bai petrol, bai kyiad, bai mar poh khyndew bad nangta ka bai GST, kumta, ka la dei ban sei ia ki lad jing iarap, ia ki nongshong shnong ha kane ka por.
Ka long ruh ka jing lehrain, ha kaba kum kane ka por, lada ka sorkar India ne ka sorkar jylla, ki pyni jingkhein, ba ki ioh kamai buk buk, lyngba ki jinglum khajna bad lada ka long kumta, ka pyni, ba ki khun, lada ki iap tyrsaw ruh kam lei lei, tangba dei ban tangon beit da ki khajna remdor ban bam doh pasoh ialade.
Dei keiñ, imat kane te la dei beit ba ka Sorkar jylla jongngi nga la mut ban pyniap thngan ym ba ngin iap pang.