Shlei mam, ki mynder suda, ha ki jaka sorkar

Ki mynder shisngi, kim don jaka leit jaka wan shuh ha kine ki sngi, namar lada shong ha Manipur ruh, ka don ha ka jingkhie thma kaba jur, lada leit sha Mizoram ruh, ym don jaka, lada poi sha Nagaland ruh ym don lynti bad mynta kitei ki jylla, ki la sdang ban pyntreikam sa ka jingshim jingkhein, lane ka biometric system; halor ka jingwan rung kiba nabar, khamtam kiba na Myanmar bad ka thong hi, ka long ban pyntreikam noh ia ka National Registration Citizenship (NRC), ia ki nongshong shnong ha kitei ki jylla.

Ki poiwir, kim don jaka shuh bad ka dei sa tang ka Meghalaya, kaba pdiang sngewbha, ia kiba wan na Assam, na Bangladesh, namar ba ka dei tang kane ka jylla, ka bym don ki kyndon, ban khang, ia ki wanwir wanhap.
Ngi iohi, da la ki jong ki khmat, ba kiba bun bah ki jaka jong ki shipai, ki la kurup lut ki bar jylla bad ngin ia peit tang ia ka Luckier Road, ha kaba ki ieng ki temple, ki dukan kiba heh ba heh bad kitei ki dei ki dukan jong ki dkhar suda; katba lada phi shim jingkhein, ym don uwei ruh, u trai shnong, u ban ioh, wat tang i basa ban tap shiliang.

Kam dei tang kata; peit ka thain Mawlonghat, ka ieng ka iing Cinema bad ka petrol pump bad mynta, katei ka la dei ka jaka khaii pateng kaba kynsai tam bad ki shipai, ki la nang kam trai shuh shuh, ia ki jaka, kiba don ha them Bijoy bad lada ka sorkar jylla, kam peit sani bha, kitei ruh, kin sa poi sha ki kti jongno re jongno, ba kin tei ia ki dukan heh lane ki jaka khaii.
Wan sa ka Mahadev Khola, hangne ruh, la iohi, ba kumno ki bar jylla, ki la ioh rung khlieh, da kaba ki tei iing tem sem beain; hynrei, kaba lyngngoh, ka long, ba kumno ka tnat khlaw, kam shym la iohi satia, da ki phew phew snem bad ka shu shah jem, ba kin ialeh katba mon, khlem da bud pyrkhing ia ki jingteh kyndon.

Ki poiei kim salia eiei ban kurup, ia ki jaka sorkar ne ki jaka jong ki riew shimet, namar kitei ki la peit nuksa, na ka jingshlur jong ki kharmetor, ha kaba ki dang pynktha janor kai, ia ki ophisar ne ki myntri sorkar jylla, da kaba ki kren kyllain kumne kumtai bad haduh mynta, ngi iohi, ba kim pyndem satia, ban kynriah na them Iew Mawlong, kaba dei ka jaka kaba khapngiah tam ha Shillong.

Ka sorkar jylla, ka la dei ban iakren kyrkieh ia ka sorkar India, ba kan pynphai noh ia ki jaka jong ka Cantonment Shillong sha kti jong ka sorkar jylla, namar ba kine ki jaka, ki shu khapngiah na ka por sha ka por, ha kaba la shu aiwai naphang lin, ia ki heh spah bar jylla, khlem da pyrkhat ia ka bit ka biang jong u luk u lak bad ka jingsuk ka leit ka wan ia uba bun bad ki jaka lada dei ha Them metor, lane ha Luckier Road, kin dei ki jaka kiba biang tam ban shna dukan bad pynieng kali, ban kylluid ka sor Shillong.