Ka jingjyllei ki kali Assam, ka la pyn khapngiah sbak, ia ka leit ka wan, ha ki surok bah ha Shillong bad kam dei tang katta, hynrei, ki surok shnong, ki mad ia katei ka jingeh, namar ba kitei ki kali dkhar, ki la leit rung lut sha ki shnong ki thaw, ki krem ki kroh bad ka jingbhabriew jong ka Ri Khasi, ka la pynshoh bieit, naduh ki tyllong dohnud jongki, ha kaba kim tieng shuh, ia u slap, ia ka lyer, ia u lyoh, uba rben tasam bad nangta, sa ki khniang ki ksiah kiba boi bad kiba snoh, ha ka jingiaid lynti jongki, kum ki thliem, kiba snoh bad kjit snam, nangta sa ki skain pyrjong, ki thapbawa, ki bsein bad kiwei ki khniang, kiba ju don bha, sha ki khlaw ki btap ha ka por lyiur.
Kane ka mat, ka la pynlong ruh ia u myntri ka tnat shangkai pyrthei, U bah Paul Lyngdoh, ba un shimkhia ia ka jingjyllei sat, kitei ki kali Assam, kiba la rung lut sha ki shnong kiba sha kyndong bad wat kiba rit tam jong ka ri Khasi, halor kata ka mat jong ka jingleit shangkai pyngngad.
Ka jingdheng kali, ka la iai jia jan man ka sngi sha wah Umngot, ha Dawki, nangta, ka ju jia sa sha ka thain Upper Shillong, ynda la janmiet bad ka bteng, da ki 4,5 kynta bad khlem pep, katei kajuh ka jingrung ki kali, ka jia hi sha ki shnong ki thaw ka Sohra ruh.
Katkum ka jingong jong U bah Paul Lyngdoh, ka long, ba ka dei ban don ka jingiakren kaba sngewthuh bha, hapdeng ka Assam bad ka Meghalaya bad kata ka long, ba ki shnong ka Ri Khasi, kim lah satia, ban pdiang ia ki hajar tylli ki kali, kiba wan na Assam bad ka dei hi ruh, ban da pyni, ia ki jingshisha, ba ka Dawki, kam lah ban pdiang ia ki kali kiba nabar ha ka sngi iew jongka bad nangta ka Pynursla, ka Sohra bad lada ngi lah ban pynsngew thuh shwa, tang katta, khlem pep, ka jingdheng kali, kan jin da la duna bha.
Ki heh jabieng ka Assam, ki la stad shibun ban shna pisa, ban thied ia ki kali remdor, kiba heh bad kiba rit bad katno ka jingkamai jongki, ka la kiew stet shibun, da kaba wan ialam ia ki nongshangkai sha ki shnong ki thaw jong ka Ri Khasi, katba ka jingbieit jongngi ki Khasi, ha kaba kat kane ka spah mariang ruh, ngim lah satia ban thaw pisa, hynrei, ngi shu ai ia ki briew kiba nabar bad ngi donbok, ba ngi don tang katto katne, kiba ioh jingmut ban shna homestay ha la ki jong ki shnong, ban shna restaurant; hynrei kiba bun, ki im tang ha kaba die sha bad ka die waidong bad kitei ki jingdie, kim dei satia kiba khring ia ki dkhar.
Ka la dei ka por, ia ka jylla, ba lada kam pat lah ban pyntreikam ia ka ain ILP, ne MRSSA ia ki briew, ka dei ban sdang shwa, da ki kali bad kata ka long, ban nym shah, ba kin ia rung mon palat bad kata ka long ba kano kano ka shnong, kam dei ban ailad ban shu ia rung ia mih khlem jingkhein, ia ka shong ka sah, ka bam ka dih bad ka jingiaid ha ki lynti syngkien bad sa ka jaboh jabain, kaba kin ia bret ne leit shabar pathar, sha ki lynti syngkien bad ki rudnong jongngi.
ka sorkar hi kam ler kam lah ban plie lad plie lynti ia ki samla pule kiba khlem kam khlem jam ,,nuksa ka sorkar ka ong ba kan iarap ,hynrei da leit pat wad pat ki pan documents haduh sa tang uba la don lypa u don ka lad ban ioh kita ki jing iarap na ka sorkar ,long thik kumba khot khawai u Myrsiang ba theh ha ka pliang ban khot bam ia ka thring bad kane ruh kin ioh jingmyntoi tang kito kiba ia Jan bad kito ki nongmih khmut
9