Ki kynhun seng jong ki bar jylla, ha ki khyndiat taiew ba ladep, ki la sei ia ka mat Ichamati sha ka pyrthei baroh kawei bad lyngba katei ka mat, ki la kyrtiang dien ruh, halor ki jingleh jingkam jong ka seng KSU, naduh ki snem 1979.
Katei ka jing kyrtiang dien jongki, ka pyni ba ki buh jingkhein thik pa thik, ia kaei kaba ki nong ialam KSU, ki la leh ha ki bun phew snem mynshwa, halor ka mat jong ka ishu Bengalee.
Mangi te hangne, ngi la ia klet lut, namar ki don bun ki nongialam ruh ki la iap, kiba don bynta ha kitei ki jing iakhih bad kiba don bad ka seng KSU.
Kin don kiba shu shim, ba kitei ki jingkren, ki long tang ki kyntien pyn iahap jong kitei ki seng bar Jylla, hynrei ngi hap ban shim khia bha ia kane ka mat, namar ba katei kan pynbor ia ki pulit ka jylla lane lehse ba kin dawa da ka kynhun tohkit jong ka sorkar India, ba kin khyllie biang ia ki jingjia kiba la jia naduh ka snem 1979 ter ter haduh ha kine ki sngi bad katei ka jingkren, ka la dei ruh ban pynkyn dit bynriew ia ki nongialam barim ka KSU lem bad kiwei ki seng, ba kin phai dien biang ialade, halor ki jingjia bapher ha ki por jing iakhih ha ki snem 79, 87, 92 nalor kiwei pat kiba ngim ia kynmaw shuh bad ka nongrim, kaba kin ieng hangne, kan dei halor ka ishu leh niewbein ia ki rit paid, ka ishu niam, ka ishu iapher jaitbynriew bad ter ter.
Kam dei tang kata, hynrei ngi iohi ruh ba ha kine ki sngi, la pyn iasnoh ia ka jing ia kynad ha Shillong, da kaba byrngem byrsit ia ki Khasi, kiba don sha Cachar hills, sha ki them Barak bad kumta ter ter bad kitei ki jingkren, ki kdew shai ba ki thew jngai bad ki thmu ruh ban khniot bad pynher mynsiem ia ki Khasi, kiba shong ba sah ha Assam bad nangta ban pyndem toin ia ki Khasi, kiba don ha ka Jylla hi baroh kawei.
Ki la don shibun ki kynhun, kiba shim bynta lang ha kajuh ka por bad kane kam dei satia tang ka ishu politiks, kumba kam u myntri kam poh iing ka sorkar Jylla, hynrei, la iohi, ba U Tatagatha Roy, ka Sushmita Dev, ka seng sain pyrthei BJYM, ka seng ehrang Amra Bangali bad sa shibun kiwei pat, ba ki ia mih pyrthei lut, ha kane ka kynti kaba mynta bad ki dak ki shin, ki kdew ba ka don ka jing ia tylli lang jong kiwei ki jait bynriew ban pynap da u dieng phasi ia u khun khasi khara, naduh uba don sha Assam, West Bengal bad wat ha ka Ri Khasi Jaintia hi.
Na ka liang jng nga hi te nga kwah ban ong ba ka lah dei ka por ia ngi ban iatylli lang kawei kum ka jaitbynriew bad ban nym kynrandien haba wan kum kine ki jingjia khnang ba u mynder shisngi yn nym ioh lad ban shim kabu ha kane ka Ri jng ngi.
Na ka liang ka jong nga, nga kyrpad ia ka sorkar ba kan shim khia ha kaba ai ki lad jingiada ia ki khasi kiba shong ba sah ha Cachar Hills them Barak khnang ba kin shongsuk shong shngaiñ, ym tang katta hynrei ban ym ailad ruh ia ki nongpynshit da kaba pyniapher jaitbynriew .