Shah syngngeit tyngeh ka BJP ha Karnataka

Ka jingshah rem kput jong ka seng BJP, ha ka elekshon MLA ha Karnataka, ka la pynkyndit tyngeh, ia ki nongialam jongka (lehse) bad katei ka jingjia, ka pyn kynmaw ia ki kyntien, kiba ong “uba rit ruh u don la ka kylla” bad katei ka la sdang shwa na Karnataka bad lada katei ka dei ka jingsdang, kumta ki sngi jong ka BJP, ha India, ki la jan kut.

Ka Karnataka, ka la mad ia shibun bah ki jingeh, ha kine ki bun snem ba ladep bad kawei na kitei, dei ka hijab, haba la khang noh ia ki khynnah Muslim, ba kin leit skul, da kaba tap da ka hijab, kaba ju dei ka riam jong ki.

Lait na ka hijab, la kren pyrshah ia ka histori, kaba don ha katei ka jylla, kaba kynthup ia U Tipu Sultan bad ka don ka jingthmu ban pynduh jait noh ia katei ka khana jingjop thma jong U Tipu Sultan bad kam dei tang kata, ka wan ruh ka jingthmu ban pynduh noh ia ka bhah kam bhah jam jong ki Muslim, kaba don ha katei ka jylla.

Ym tang katta, sa ka jingshah kynnoh kaba jubor jong ka sorkar BJP, ha Karnataka, ka dei ba ka bamsap haduh 40 percent, na ki jingtrei kontrak ha ki tnat sorkar.

Kumba la ju kren ha kiba bun ki khep, ka la dei ba ngin pyn kynmaw, ba ia ki ishu jong ka niam, kam dei ia kano kano ka political party, ba kan tuklar; hynrei ka ishu jong ka niam, ka dei ia ki kynhun niam, ba kin sngewthuh, ia la ka jong ka jingkitkhlieh bad ka kamram jongki; namar ba tang shu la aiti ha ki riew sain pyrthei, kumta ka ishu niam ka la jot thiaw bad kam dei tang katta, ka thew ruh, ba ia ka jingngeit niam jong u briew, hap pynbor ne hap pynbiej da ki kyndon jong ki political party lane ba u briew, um ieid satia dalade, ia la ka jong ka niam.

Mynta ka la kdew shai, ba u paidlang jong ka South India, u dei uba ieid ia la ka jong ka ktien ne ia la ka jong ka dustur bad haba ka sorkar BJP, ka kwah ban phrung da ka hindi bad pynduh jait noh ia ka ktien Kanada, kumta kim lah satia ban pdiang da lei lei ruh bad kumjuh ruh, haba ka sorkar India, ka thmu ban pyntreikam ia ka Uniform Civil Code; ki hindu, kiba don shathie ka India, kim pdiang satia, ia ka jingshah pyntian jubor ia ki riti dustur, kiba wan na shatei jong ka Ri.

Ka elekshon ha Karnataka, ka la biang ban pynpei shkor ia ka BJP, ba ki hukum jong ka RSS, ne na ki jaka pdeng jong ka India, kin nym lah ban pynkohnguh ia u paidlang ba shathie jong ka Ri.